“ერთიანი ნაციონალური მოძრაობის” თბილისის მერობის კანდიდატმა ნიკა მელიამ მის კონკურენტს დებატებში მონაწილეობა არჩევნებამდე დარჩენილ ორ დღეში კიდევ შესთავაზა.
როგორც ნიკა მელიამ სასტუმრო “შერატონ მეტეხი პალასში” გამართულ დებატებზე განაცხადა, ერთსაათიანი დებატები საკმარისი არ არის.
“ძალიან მოიხარული ვარ, რომ ერთხელ და სამუდამოდ შედგა დებატები იმ ტერიტორიაზე, რასაც ნეიტრალური ტერიტორია დაერქვა. მადლობა ბატონო დავით, რომ მივიღე ინფორმაცია იმის შესახებ, რომ ჩვენ თურმე გვაქვს ნეიტრალური ტერიტორია თბილისში, ავლაბრის და “შერატონ მეტეხი პალასის” სახით. კარგია, რომ ეს დებატები შედგა, მაგრამ ერთსაათიანი დებატები ნამდვილად ვერ გვეყოფა. ხვალ და ზეგ გვაქვს ტელეკომპანიებიდან მოწვევა, რომ იქ გაიმართოს დამატებითი დებატები. ვიტოვებ იმედს, რომ თქვენ იქ გამოცხადდებით, რათა ვცეთ პატივი თბილისილებს”, – აღნიშნა გუშინ მელიამ.
მელიამ გიგი უგულავას დაკავებაზეც ისაუბრა და განაცხადა, რომ მისი დაკავება ნარმანიასთვის მეტი ხელსაყრელი პირობების შექმნას ემსახურება.
“ეს არის არჩევნები, რომელმაც უნდა გადაწყვიტოს თბილისის ბედი მომდევნო სამი წლის განმავლობაში. ეს არის არჩევნები, სადაც არჩევანი იქნება გასაკეთებელი მოძრაობასა და უმოძრაობას შორის, არჩევანი დამატებითი სამუშაო ადგლების სასარგებლოდ ან დამატებითი სამუშაო ადგილების დაკარგვის სასარგებლოდ, არჩევანი პენსიების გასაზრდელად ან პირიქით. ამავე დროს, ძალიან მნიშვნელოვანია, ყველამ კარგად ვიცოდეთ, რომ დედაქალაქში განვითარდა ისეთი მოვლენები, რომელსაც მე ვიმედოვნებდი, რომ არ განვითარდებოდა. დაკავებულია საარჩევნო შტაბის ხელმძღვანელი გიგი უგულავა, როდესაც ამის საჭიროება არ იყო. ეს ემსახურებოდა მხოლოდ ერთ მიზეზს, რომ დავით ნარმანიასთვის მეტი ხელსაყრელი პირობები შექმნილიყო”, – აღნიშნა მელიამ.
მისივე თქმით, ძალიან მნიშვნელოვანია, რომ თბილისს ჰყავდეს მერი, რომელიც ანგარიშვალდებული იქნება მოსახლეობასთან. “მნიშვნელოვანია, რომ მხარი დავუჭიროთ იმ პროგრამას, რომელიც გაჯერებულია მზა პროექტებით, ტრანსპორტით მგზავრობის ღირებულების შემცირებაზე, კომუნალური ხარჯების შემცირების კუთხით. ეს არის ის, რისთვისაც მოვდივართ. ძალიან მნიშვნელოვანია, რომ თბილისს ჰყავდეს ის მერი, რომელიც ანგარიშვალდებული იქნება მოსახლეობასთან”, – აღნიშნა მელიამ.
10.07.14
