თბილისის ახლად არჩეული საკრებულო პირველ სხდომას 14 ივლისს თავისუფლების მოედანზე, საკრებულოს ისტორიულ დარბაზში გამართავს.
როგორც “თბილისი თაიმსს” თბილისის საკრებულოდან აცნობეს, კანონის თანახმად, სხდომამ საკრებულოს თავმჯდომარე და პირველი მოადგილე უნდა აირჩიოს.
ამასთან, საკრებულოს წევრებს შეუძლიათ, კიდევ ორი მოადგილე და კომისიების თავმჯდომარეები მათი სურვილის შემთხვევაში შემდეგ სხდომაზეც აირჩიონ.
ამასთან, ამ დროისთვის არსებული ინფორმაციით, თბილისის საკრებულოს თავმჯდომარე “ქართული ოცნების” საარჩევნო სიის მესამე ნომერი გიორგი ალიბეგაშვილი გახდება.
სხდომას საკრებულოს უხუცესი წევრი სევდია უგრეხელიძე გახსნის, რომელიც წინა მოწვევის საკრებულოს წევრიც იყო. სულ წინა მოწვევის საკრებულოდან ახალი საკრებულოში ცხრა დეპუტატი მოხვდა – კოალიცია “ქართული ოცნებიდა” გიორგი მუსხელიშვილი, ჯაბა სამუშია, გულიკო ზუმბაძე და გიორგი ტყემალაძე; “ნაციონალური მოძრაობიდან” – მამუკა ახვლედიანი, თამაზ შოშიაშვილი, სევდია უგრეხელიძე, თემურ გრიგალაშვილი და ირაკლი ნადირაძე.
თბილისის ახალ საკრებულოში “ნაციონალური მოძრაობას” 7 დეპუტატი ეყოლება. წინა მოწვევის საკრებულოში უმრავლესობას ფრაქცია `ნაციონალური მოძრაობა~ წარმოადგენდა, რომელსაც მაჟორიტარი წესით არჩეული 14 და პარტიული სიით გასული 25 წევრი ყავდა. ოპოზიციიაში 11 დეპუტატი იყო – პოლიტიკური გაერთიანებიდან `ალიანსი საქართველოსთვის~ ხუთი, `გიორგი თარგამაძე, ინგა გრიგოლია _ ქრისტიან-დემოკრატიული გაერთიანებიდან~ _ სამი, `ეროვნული საბჭოდან~ _ ორი და `თოფაძე _მრეწველებიდან~ _ ერთი.
ახალ საკრებულოში კოალიცია “ქართულ ოცნებას” პროპორციული სიით 13, ხოლო მაჟორიტარული სიით 24 წევრი ეყოლება. სხვა საარჩევნო სუბიექტებიდან პროპორციული სიით თბილისის საკრებულოში ნინო ბურჯანაძის პარტიის სამი და “დავით თარხან მოურავი _ პატრიოტთა ალიანსიდან” ორი წევრი მოხვდა. კიდევ ერთი წევრი, ალეკო ელისაშვილი დამოუკიდებელი კანდიდატი იყო.
12.07.14
