ვერ მივულოცავ იმ კანდიდატს გამარჯვებას, რომლის გამარჯვებისათვის საჭირო გახდა დედაქალაქის ყოფილი მერის დაკავება, – ასე შეაფასა “ერთიანი ნაციონალური მოძრაობის” თბილისის მერობის კანდიდატმა ნიკა მელიამ არჩევნების მეორე ტურის წინასწარი შედეგები.
ნიკა მელიამ მადლობა გადაუხადა პირველ რიგში ყველა ამომრჩეველს, განსაკუთრებით კი იმ ამომრჩეველს, რომელიც საარჩევნო უბნებზე გამოცხადდა და მხარი მას დაუჭირა.
“140 უბნის შედეგია ცნობილი, რომელიც გვამცნობს, რომ მე ამ არჩევნებში ვერ მოვიპოვე გამარჯვება. მე ბედნიერი ადამიანი ვიქნებოდი, ბედნიერი თბილისის მოქალაქე ვიქნებოდი, რომ მომცემოდა საშუალება მომელოცა ეს გამარჯვება ჩემი კონკურენტისათვის, მაგრამ მე ვერ მივულოცავ იმ კანდიდატს გამარჯვებას, რომლის გამარჯვებისათვის საჭირო გახდა დედაქალაქის ყოფილი მერის დაკავება, რომელმაც, ჩემი აზრით, ქალაქი ნამდვილად ქალაქად აქცია. თუმცა, რა თქმა უნდა, როგორც ამ ქალაქში მაცხოვრებელი ადამიანი ვუსურვებ მას წარმატებას და ბედნიერი ადამიანი ვიქნები თუ იგი შეძლებს იმ დაპირებების შესრულებას, რომელიც მან უხვად გასცა”, – აღნიშნა მელიამ.
თუმცა, მისივე აზრით, არანაირი წინაპირობა არ არსებობს, რომ დავიტ ნარმანიამ ამ დაპირებების შესრულება თუნდაც იოტისოდენა დონეზე შეძლოს.
ცესკო-ს პირველადი მონაცემების მიხედვით, ადგილობრივი თვითმმართველობის არჩევნების მეორე ტურში კოალიცია “ქართული ოცნების” კანდიდატი დავით ნარმანია ლიდერობს.
ცესკო-ს თავმჯდომარე თამარ ჟვანიას განცხადებით, ამ დროისთვის დათვლილია თბილისის 727 უბნიდან 140 უბნის მონაცემები, რომლის მიხედვითაც დავით ნარმანიას ხმა არჩევნებზე მისულ ამომრჩეველთა 73,51%-მა მისცა, “ერთიანი ნაციონალური მოძრაობის” კანდიდატ ნიკა მელიას კი მხარი არჩევნებზე მისულ ამომრჩეველთა 26.49%-მა დაუჭირა.
12.07.14