საქართველოს პრემიერ-მინისტრი ირაკლი ღარიბაშვილი დაბა ჩაქვის ტერიტორიაზე ახალი საკურორტო ზონის პროექტის პრეზენტაციას დაესწრო. როგორც პრემიერმა სიტყვით გამოსვლისას განაცხადა, ეს არის ყველაზე მსხვილი ევროპული ინვესტიცია აჭარაში.
“ჩვენთვის ნამდვილად საამაყოა, რომ თანამედოვე, პერსპექტიული აპარტოტელის ტიპის პროექტის განხორციელების ადგილად ავსტრიელმა ინვესტორებმა საქართველოს კურორტი შეარჩიეს. ეს იმას ნიშნავს, რომ საქართველო არის სანდო და საიმედო პარტნიორი სერიოზულ პროექტების განხორციელებისთვის”, – განაცხადა ღარიბაშვილმა.
მისი თქმით, აპარტოტელის სისტემა ძალიან კარგი მოდელია ტურიზმის განვითარებისთვის მთელ მსოფლიოში, ეს არის ახალი ტექნოლოგია ტურიზმში და ამ მოდელით არაერთ ქვეყანაში განვითარდა ტურიზმი.
“ჩვენ მივესალმებით, რომ ის ჩვენს ქვეყანაშიც მკვიდრდება. ეს მოდელი ვფიქრობთ, მომგებიანი იქნება ჩვენი ქვეყნისთვის მაღალშემოსავლიანი ტურისტების ნაკადის გაზრდის თვალსაზრისით და რა თქმა უნდა, ეკონომიკის სტიმულირებას შეუწყობს ხელს.
მე დიდი იმედი მაქვს, რომ აჭარას, მთელ საქართველოს ექნება ერთ-ერთი ყველაზე კეთილმოწყობილი საცხოვრებელ-დასასვენებელი კომპლექსი უმაღლესი დონის ინფრასტრუქტურით. უფრო მეტიც, მე დარწმუნებული ვარ, ეს იქნება ერთ-ერთი გამორჩეული საჩვენებელი ადგილი მთელ შავიზღვისპირეთში. ეს პროექტი მოიტანს დამატებით სამუშაო ადგილებს და დიდი შეღავათი იქნება ადგილობრივებისთვის. ამ პროექტის სამშენებლო გადასახადების სახით ბიუჯეტში ყოველწლიურად შევა 6 მილიონი ლარი. ეს კიდევ იმის დადასტურებაა, რომ საქართველოში ბიზნესის წარმოება ინვესტორებისთვის არის მომგებიანი და სახელმწიფოსთვის. ჩვენ გავაკეთებთ ყველაფერს, რომ მაქსიმალური ხელი შევუწყოთ ბიზნესის განვითარებას საქართველოში, ინვესტორებს, ტურისტებს შევუქმნათ მაქსიმალურად კომფორტული გარემო”, – განაცხადა ღარიბაშვილმა.
მისივე თქმით, შეიძლება ითქვას, რომ DREAMLAND OASIS-ის პროექტით ქართულ ტურისტულ ინდუსტრიაში იწყება ახალი ეტაპი, ახალი ფაზა.
“მე მჯერა, რომ ეს იქნება ერთ-ერთი წარმატებული პროექტი და გახდება სტიმული პოტეცნიური ინვესტორებისთვის. მთავრობა ყველაფერს გაკეთებს, რომ დაინტერესება კიდევ უფრო გაიზარდოს. მე მჯერა, რომ საქართველო სულ მალე გახდება ყველაზე საინტერესო, სტაბილური და პერსპექტიული ქვეყანა ტურიზმის განვითარების კუთხით”, – აღნიშნა პრემიერმა.
ახალი საკურორტო ზონა ჩაქვში, სასტუმრო “ოაზისის” ირგვლივ მოეწყობა. ინფრასტრუქტურის განვითარებაში კომპანია DREAMLAND OASIS-ი 105 მლნ დოლარის ინვესტირებას გეგმავს.
26.07.14
