დღეს კიევიდან, ხარკოვიდან და დნეპროპეტროვსკიდან ლუგანსკის ოლქის მიმართულებით ჰუმანიტარული ტვირთით დატვირთული ავტოკოლონები დაიძრა.
უკრაინის ინფრასქტრუქტურის მინისტრის მაქსიმ ბურბაკის განცხადებით, კიევიდან დაძრული რამდენიმე ათეული ტრაილერისაგან შემდგარი კოლონა მიემართება სტარობელსკში (ლუგანსკის ოლქი).
„ჩვენ თათბირი ჩავუტარეთ მძღოლებს და დავაწყნარეთ ისინი – მათი უსაფრთხოება დაცული იქნება“ – განაცხადა მინისტრმა. მისი თქმით, მისია ნაწილობრივ ბიუჯეტიდან დაფინანსდა, ნაწილობრივ ქველმოქმედებით. მთავრობამ ამ მიზნით დამატებით 10 მილიონი გრივნა გამოყო.
ხარკოვიდან ლუგანსკის მიმართულებით 220 ტონა ჰუმანიტარული ტვირთი დაიძრა. სულ კოლონაში 26 ტრაილერია. აქედან 18 ტრაილერის ტვირთი ხარკოვის ოლქმა საკუთარი ძალებით შეაგროვა. როგორც ხარკოვის საოლქო ადმინისტრაციაში განაცხადეს, წინა ჰუმანიტარული მისიების გამოცდილების გათვალისწინებით, 19 ტონა ტვირთი 10500 ადამიანზე ნაწილდება.
სამივე ქალაქიდან გაგზავნილი უკრაინული ჰუმანიტარული კოლონები მიემართებიან სტარობელსკში (ლუგანსკის ოლქი), სადაც ტვირთს წითელი ჯვრის საერთაშორისო ორგანიზაცია გადაიბარებს. წითელი ჯვარი ჰუმანიტარულ ტვირთს გადაანაწილებს ლუგანსკისა და დონეცკის ოლქების იმ რაიონებში რომლებსაც სეპარატისტები აკონტროლებენ.
ამავე დროს, კვლავ გაურკვეველი რჩება რუსული 280 მანქანიანი ”ჰუ,ანიოტარული ბადრაგის” ბედი. წითელი ჯვრისთვის და უკრაინის ხელისუფლებისათვის კვლავ უცნობია როგორც ტვირთის შემადგენლობა, ასევე „ბადრაგის“ მარშრუტი. ბოლო მონაცემებით, რუსული კოლონა დღეს დილით კვლავ ამოძრავდა. ბიბისი-ს კორესპონდენტის მიერ მოპოვებული ინფორმაციით, კოლონა სავარაუდოდ როსტოვის ოლქისაკენ მიემართება და საზღვარს იზვარინოს სასაზღვრო გამშვები პუნქტის გავლით გადაკვეთს. აქ რეგიონს მთლიანად სეპარატისტები აკონტროლებენ.
ამავე დროს,წითელმა ჯვარმა რუსული ჰუმანიტარული ტვირთის შემოწმება მოითხოვა. ორგანიზაციაში თვლიან, რომ ტვირთზე მათი პატრონაჟისათვის აუცილებელია დამხარების წითელი ჯვრის მანქანებზე გადატვირთვა. სწორედ ამის კატეგორიული წინააღმდეგია რუსეთი. კრემლი მოითხოვს, რომ კოლონამ უცვლელად განაგრძოს მოძრაობა ლუგანსკის მიმართულებით, რაც უკრაინისა და დასავლეთის ეჭვებს ამ მისიასთან დაკავშირებით კიდევ უფრო აღრმავებს.
14.08.14