სასკოლო სახელმძღვანელოების 80% დაბეჭდილია და საქართველოს მასშტაბით არსებულ სკოლებში გადანაწილებულია.
დღეს, საქართველოს განათლებისა და მეცნიერების მინისტრი თამარ სანიკიძე თბილისის სკოლებისთვის სახელმძღვანელოების გადაცემის პროცესს დაესწრო. მინისტრი გასულ სასწავლო წელს გამოყენებული წიგნების ვარგისიანობით დაინტერესდა და ერთი მოსწავლისთვის განკუთვნილი წიგნების პაკეტსაც გაეცნო. ახალ სახელმძღვანელოებთან ერთად, პაკეტი საუკეთესო მდგომარეობის წიგნებით არის დაკომპლექტებული და ის ყველა მოსწავლეს გადაეცემა.
საქართველოს განათლებისა და მეცნიერების სამინისტრო 2013 წლიდან “მოსწავლეების სახელმძღვანელოებით უზრუნველყოფის პროგრამას“ ახორციელებს. 2014 წელს სახელმწიფო 509 651 მოსწავლეს გაუმჯობესებული ხარისხის სახელმძღვანელოებსა და სამუშაო რვეულებს უსასყიდლოდ გადასცემს.
2014 წლის მთავარი სიახლეები:
- შემცირდა სახელმძღვანელოების წონა;
- გაუმჯობესებულია ქაღალდისა და საღებავის უვნებლობის ხარისხი;
- პირველი კლასის ყველა სახელმძღვანელო დაიბეჭდა თანამედროვე სპეციალურ საბეჭდ ქაღალდზე, რომელიც გამოირჩევა სიმსუბუქითა და გამძლეობით;
- თორმეტივე კლასის უსინათლო მოსწავლეები ბრაილის შრიფტით დაბეჭდილ სახელმძღვანელოებს მიიღებენ.
21.08.14
