ალექსანდრე ჭიკაიძე დარიალის ხეობაში იმყოფება

საქართველოს შინაგან საქმეთა სამინისტრო დარიალში ჩამოწოლილ მეწყერთან დაკავშირებით განცხადებას ავრცელებს.

შსს-ს ინფორმაციით, ამ დროისთვის უგზო-უკვლოდ დაკარგულად ითვლება 2 პირი , რომლებიც გვირაბში სამუშაოებს აწარმოებდნენ. უწყების განცხადებით, ხეობაში ჩამოწოლილი მეწყერის შედეგად ჩაიხერგა დევდორაკის ხეობა და “დარიალჰესის” გვირაბი.

დარიალის ხეობაში იმყოფება შინაგან საქმეთა მინისტრი. ალექსანდრე ჭიკაიძე არსებულ ვითარებას ადგილზე ეცნობა.

ასევე, შსს-ს საგანგებო სიტუაციების მართვის დეპარტამენტის სრული შემადგენლობა მობილიზებულია დარიალის ხეობაში. მდინარე თერგის წყალი გადაკეტილია და გვირაბის ზედა ნაწილში მიმდინარეობს საძიებო-სამაშველო სამუშოები. გვირაბის ქვედა ნაწილში მძიმე ტექნიკის საშუალებით დაიწყო გაწმენდითი სამუშაოები.
დარიალის ხეობაში მეწყერი წუხელ ჩამოწვა. დატბორილია ყაზბეგი-ლარსის საბაჟო. ხეობაში ავტოტრანსპორტის მოძრაობა აკრძალულია.

დარიალის ხეობაში მეწყერი მიმდინარე წლის 17 მაისსაც ჩამოწვა. მაშინ სტიქიას 5 ადამიანის სიცოცხლე ემსხვერპლა.

21.08.14