უკრაინის აღმოსავლეთით რუსი სამხედროები პოზიციებს იძლიერებენ. ბოლო მონაცემებით, რუსული ტანკების შეტევის შედეგად, სამთავრობო ძალებმა ლუგანსკის ოლქის ქალაქ ლუტუგინოდან უკან დაიხიეს.
შინაგან საქმეთა მინისტრის მრჩევლის ინფორმაციით, სეპარატისტებთან ერთად, რუსეთის არმიის ქვედანაყოფები აკონტროლებენ დონეცკის ოლქის ქალაქ საურმოგილასა და ამროსიევკასაც.
განსაკუთრებით მძიმე ვითარებაა დონეცკის ქალაქ ილოვაისკში, სადაც საომარი მოქმედებების შედეგად, 100-მდე უკრაინელი სამხედრო დაიღუპა.
უკრაინელმა მებრძოლებმა კონტროლი დონეცკისა და ლუგანსკის აეროპორტებზეც დაკარგეს. ორივე სტრატეგიულ წერტილს ამ დროისთვის რუსეთის შეიარაღებული ძალების სატანკო ბრიგადა იკავებს.
საომარი მოქმედებების მიუხედავად, უკრაინის პრეზიდენტი საომარი მდგომარეობის გამოცხადებაზე ჯერ ისევ ფიქრობს. რადის ფრაქცია “სვობოდას” ლიდერ ოლეგ ტიაგნიბოკის თქმით, არ არის გამორიცხული, რომ ამ წინადადებით პოროშენკომ პარლამენტს მალე მიმართოს. თუმცა, უკრაინის “მეხუთე არხზე” დაყრდნობით, განსხვავებულ ინფორმაციას ავრცელებს “ლენტა რუ”, რომელიც წერს, რომ პრეზიდენტი ქვეყანაში საომარი მდგომარეობის შემოღებას არ აპირებს.
02.09.14
