საქართველოს განათლებისა და მეცნიერების მინისტრმა თამარ სანიკიძემ პროგრამის “ასწავლე საქართველოსთვის” მონაწილე მასწავლებლებს სერტიფიკატები გადასცა.
როგორც “თბილისი თაიმსი” საქართველოს განათლებისა და მეცნიერების სამინისტროდან აცნობეს, ღონისძიება მასწავლებლის სახლში გაიმართა. მათივე ინფორმაციით, საზეიმო მიღებაზე ნაჩვენები იყო დოკუმენტური ფილმი პროგრამის მონაწილეებსა და მათ საქმიანობაზე.
“პროგრამის “ასწავლე საქართველოსთვის” მიზანია რეგიონებში სწავლების ხარისხის გაუმჯობესება და იქ, სადაც მასწავლებლის დეფიციტია, ახალგაზრდა კვალიფიციური კადრების დასაქმება. განსაკუთრებულ ყურადღებას და დახმარებას საჭიროებენ რეგიონები, სადაც მოზარდები ვერ ღებულობენ შესაბამის განათლებას. არსებული ვითარების პრევენციისა და სკოლებში ხარისხიანი განათლების უზრუნველყოფის მიზნით, პროგრამა ბოლო წლებში დაიხვეწა და სრულად მოერგო საჭიროებებს”, – აცხადებენ სამინისტროში.
მათივე ინფორმაციით, განახლებული პროგრამის ფარგლებში 2014 წლიდან გაფართოვდა გეოგრაფიული არეალი.
“2014 წლიდან პროგრამის გეოგრაფიული არეალი მოიცავს არა მხოლოდ მაღალმთიანი და შორეული რაიონების სკოლებს, არამედ ფარავს საქართველოს ყველა იმ საჯარო სკოლას, რომლებშიც კვალიფიციური მასწავლებლის დეფიციტია; გაიზარდა მასწავლებელთა ანაზღაურება – სკოლებში საათობრივი დატვირთვის მიხედვით მიღებულ ანაზღაურებას ემატება დანამატი, რომლის ოდენობა განისაზღვრა იმის მიხედვით, თუ რა მანძილზე მდებარეობს სკოლა მონაწილის რეგისტრირებული საცხოვრებელი ადგილიდან და შეადგენს 1000 ლარამდე სკოლის ხელფასზე დანამატის სახით; პედაგოგთა 50% შესაბამისი საგნის მასწავლებლობის სერტიფიკატს ფლობს, რაც ასევე სიახლეა, ვინაიდან, 2014 წლიდან შესარჩევ ეტაპზე უპირატესობა, სწორედ ასეთ კატეგორიას ენიჭება”, – განმარტავენ სამინისტროში.
მათივე ინფორმაციით, 2013-2014 სასწავლო წელს პროგრამაში ჩართული იყო 146 კონსულტანტ-მასწავლებელი, რომლებიც საქართველოს სხვადასხვა კუთხის საჯარო სკოლაში ერთი წლის განმავლობაში პედაგოგიურ საქმიანობას ეწეოდნენ. მათგან 114, სექტემბრიდან პროგრამაში რჩება. მასწავლებელთა ნაწილი კი მაგისტრატურაში სწავლის გაგრძელების მიზნით, პროგრამაში მონაწილეობას აღარ აგრძელებს, რასაც ასევე, პროგრამის ფარგლებში მოპოვებული სახელმწიფო გრანტის საფუძველზე, მონაწილეებს სამინისტრო უფინანსებს.
პროგრამა “ასწავლე საქართველოსთვის” სამინისტროს მასწავლებელთა პროფესიული განვითარების ეროვნული ცენტრის მიერ ხორციელდება.
08.09.14
