ბათუმში, სამართალდამცავებმა წუხელ, გვიან ღამით ასლან აბაშიძის შვილი გიორგი აბაშიძე სპეციალური კონტროლის დროს დააკავეს. გავრცელებული ინფორმაციით, გიორგი აბაშიძე გვიან ღამით ბათუმის პოლიციამ ნარკოლოგიური შემოწმების მიზნით დააკავა.
“გიორგი გვიან ღამით ბათუმის პოლიციის მეექვსე განყოფილების თანამშრომლებმა დააკავეს და ნარკოლოგიური შემოწმების მიზნით ნარკოლოგიურ დაწესებულებაში გადაიყვანეს. დაკავებიდან ნახევარ საათში შევხვდი მას. გიორგი აბაშიძე აპროტესტებს დაკავებას და აცხადებს, რომ მისი აყვანა გამიზნული იყო”, – აცხადებს ადვოკატი რამინ პაპიძე.
მისივე ინფორმაციით, აბაშიძის მტკიცებით, დაკავების დროს სამართალდამცველების მხრიდან ადგილი ჰქონდა უხეშობას და მისი აყვანა არაკორექტული ფორმით მოხდა.
“მას ასევე არ განუმარტეს არანაირი უფლებები”, – აღნიშნავს აბაშიძის ადვოკატი.
რამინ პაპიძის ინფორმაციით, გიორგი აბაშიძე ბათუმში სამი დღის წინ ჩავიდა.
გიორგი აბაშიძეს ნარკოტიკული ნივთიერების მოხმარება დაუდგინდა. ამის შესახებ news.ge შინაგან საქმეთა სამინისტროს პრესსამსახურში განუცხადეს.
მათივე ინფორმაციით, გიორგი აბაშიძეს 500 ლარიანი ჯარიმის გადახდა დაეკისრა.
“გიორგი აბაშიძე ადმინისტრაციულ სამართალდარღვევათა კოდექსის 45-ე მუხლით დააკავეს. იგი გადაიყვენს ნარკოლოგიურ შემოწმებაზეე, დაუდგინდა ნარკოტიკული ნივთიერების მოხმარება და დაჯარიმდა. მას 500 ლარიანი ჯარიმის გადახდა დაეკისრა”, – აცხადებენ შინაგან საქმეთა სამინისტროში.
არსებული ინფორმაციით, გიორგი აბაშიძე დღეს, ჯარიმის თანხის გადახდის შემდეგ გათავისუფლდება.
12.09.14
