მოხარული ვიქნებით, ვუმასპინძლოთ მის უწმინდესობას, რომის პაპ ფრანცისკეს საქართველოში, – ამ სიტყვებით მიმართა საქართველოს პრემიერ-მინისტრმა ირაკლი ღარიბაშვილმა ვატიკანის (წმინდა საყდარი) სახელმწიფოებთან ურთიერთობების მდივანს, არქიეპისკოპოს დომინიკ მამბერტის, რომელსაც დღეს მთავრობის ადმინისტრაციაში შეხვდა.
საუბრის ერთ-ერთი მთავარი თემა ვატიკანისა და საქართველოს ორმხრივი ურთიერთობების გაღრმავება იყო.
ირაკლი ღარიბაშვილმა დომინიკ მამბერტის საქართველოს ტერიტორიული მთლიანობის მხარდაჭერისა და ოკუპირებული რეგიონების არაღიარების პოლიტიკისთვის მადლობა გადაუხადა.
შეხვედრაზე ხაზგასმით აღინიშნა საქართველოს მრავალწლიანი ქრისტიანული ტრადიციები და ქართველი ერის ისტორიული ტოლერანტობა.
„საქართველოს განსაკუთრებული ადგილი უკავია ქრისტიანულ სამყაროში. ქართული ეკლესია ერთ-ერთი უძველესია ქრისტიანული ეკლესიებს შორის“, – განაცხადა არქიეპისკოპოსმა პრემიერთან შეხვედრისას.
მხარეებმა განათლებისა და კულტურის სფეროში თანამშრომლობის გაღრმავების პერსპექტივებზეც იმსჯელეს.
15.09.14
