საქართველოში, კულტურის სფეროში არსებული პრობლემების მიუხედავად, საბედნიეროდ ჩვენი ქვეყანა ხელოვანი ადამიანების ნაკლებობას არ განიცდის. ხელოვნება, ეს ნიჭიერი ადამიანის მიერ სამყაროს შემოქმედებითი აღქმაა. ამ აღქმის ნაყოფი ეკუთვნის არა მხოლოდ მის შემქმნელს, არამედ ყველას ვისაც საშუალებაა აქვს იგი დაინახოს, შეეხოს მას, შეიგრძნოს და დააკვირდეს. ხელოვანი ადამიანების ცხოვრების გზა ყოველითვის ხელოვნებით არ დაწყებულა, ასე მოხდა თეონა ბაკურაძისა და მაია თავართქილაძის შემთხვევაშიც. მათი სახელები დღეს უკვე, ორი წლის „ბედნიერების სახელოსნოსთან,“ „ბუერასთან“ ასოცირდება, რომელიც ხელნაკეთ აქსესუარებს ქმნის. მიუხედავად იმისა, რომ პროფესიით ერთი ფსიქოლოგია, მეორე კი -ბიზნეს სამართლის სპეციალისტი, გამოყენებითი ხელოვნება ყოველვის მათი ინტერესის სფერო იყო. „ბუერა „ არსებობს უკვე ორი წელია. დასაწყისიდან დღემდე მის ზრდა-განვითარებაზე ვზრუნავთ მე – თეონა ბაკურაძე და მაია თავართქილაძე. ჩვენი პროფესია ჩვენივე საქმიანობისგან განსხვავდება, თუმცა ამ გარემოებას ჩვენთვის ხელი არ შეუშლია, პირიქით ხელი შეგვიწყო ჩვენეული სტილის შექმნაში.“ ნათქვამია, რომ საყვარელი საქმის კეთების გადადება დანაშაულია, ეს ადამიანები კი ცდილობენ იმის დამტკიცებას, რომ მიუხედავად ყველაფრისა, საუკეთესო რამ არის, აკეთო შენი საყვარელი საქმე და ეს იყოს შენი, როგორც სულიერი, ისე ფიზიკური საზრდოს წყარო. მათ მიაჩნიათ, რომ ჩვენი ქვეყნისთვისაც საუკეთესო გზაა – თითოეულმა მოქალაქემ აკეთოს თავისი საყვარელის საქმე პატიოსნად, მონდომებით, სრული განცდითა და სიყვარულით. „ძალიანაც, რომ მოინდომო ვერსად წაუხვალ შენს მოწოდებას, ასეა ჩვენს შემთხვევაშიც და ამით ძალიან ბედნიერები ვართ. როგორც იქნა იმ საქმეს ვაკეთებთ, რაც ყოველთვის მოგვწონდა და გვაინტერესებდა, უამრავი იდეა გვაქვს, დრო გვეცოტავება და ძილისთვის გვენანება.“
„ბუერა“ ხელნაკეთ აქსესუარებსა და სხვადასხვა ნაკეთობებს უკვე ორი წელია წარმატებით ამზადებს. ეს, საკმაოდ რთული და შრომატევადი საქმეა. ისინი მუშაობენ პოლიმერულ თიხაზე, ეს გამძლე და კარგი მასალაა, რომელიც ძირითადად სამკაულების და მცირე ზომის სკულპტურების, თოჯინების, მინიატურების დასამზდებლად გამოიყენება.
ხელოვნების ეს პატარა და მყიდველისთვის განსაკუთრებული ნიმუშები არ არის ადვილად მსხვრევადი, მრავალფეროვანია, ლამაზი და რა თქმა უნდა, უსაფრთხოა. მაია და თეონა უმეტეს დროს ბეჭდების, სამაჯურების, ყელსაბამების, გულსაბნევებისა და მინიატურების შექმნას უთმობენ, მათთვის ეს ყველაფერი განტვირთვის საუკეთესო საშუალებაცაა. გოგოებმა სიტყვა „ბუერა“ სულხან-საბა ორბელიანის ლექსიკონიდან აარჩიეს, რომელიც მცენარის სახელია, მოეწონათ მისი კეთილხმოვანება და საკუთარ სახელოსნოს სწორედ ეს სახელი შეურჩიეს. თუმცა, დღეს ბევრისთვის „ბუერა“ ასოცირდება სწორედ „ბედნიერების სახელოსნოსთან“, სადაც ადამიანებს შეუძლიათ მიჰყვნენ თავიანთ ფანტაზიას, შეუკვეთონ სასურველი ნივთი, სასურველი ნახატით ან ფრაზით.„გაგვიხარდება, თუ ჩვენს ფეისბუქ გვერდს ბევრი ახალი მეგობარი გამოუჩნდება. ეს სიტყვა შემთხვევით არ გამოგვიყენებია, ჩვენ მართლაც ვმეგობრობთ ჩვენს მომხარებელთან. ყურადღებით ვუსმენთ მათ რჩევებს, შენიშნვნებს. შეკვეთებზე დაყრდნობით უკვე მივხვდით, რა მოსწონთ და უყვართ და უკვე უფრო ადვილად შეგვიძლია ისეთი პროდუქტის შექმნა, რაც ბევრ მათგანს გაუთბობს გულს. „ სოციალურ ქსელში საკმაოდ აქტიურია „ბუერა“, საზოგადოების
უმეტესობამ სწორედ ფეისბუქის საშუალებით გაიგო მათ შესახებ. შეკვეთაც სწორედ ამ გზით ხორციელდება, მომხმარებლების იდეების ნივთამდე დაყვანაში მაია და თეონაც აქტიურად არიან ჩართულნი, ისინი ერთად ფიქრობენ ესკიზებისა და ნივთების საუკეთესო ვარიანტებს. უკვე დამზადებულ ნივთებს კი საკუთარი ხელითვე შეკერილ შესაფუთ ჩანთებში დებენ და ასე გამზადებულს ახვედრებენ მყიდველებს. „როდესაც ადამიანს სურს, მეგობარს აჩუქოს რაღაც ისეთი, რაც მათ მეგობრობას ყველაზე კარგად ასახავს, რაღაც საიდუმლო სიტყვის მსგავსი, რისი მნიშვნელობაც მხოლოდ მათ იციან, მოდიან და გვიკვეთავენ, ჩვენ ვაკეთებთ, და ისტორიას ვაქცევთ ნივთად.“ „ბუერას“ პირველი გამოფენა-გაყიდვა მიაძაკისადმი მიძღვნის საღამოზე მოხდა. Buera loves Hayao Miyazaki სტუმრებში დიდი მოწონება დაიმსახურა. ამას გარდა აქსესუარები გამოფენილი იყო – “Tbilisi Flea Market“-ზეც. მათი დიდი ნაწილის შეძენა დღეს აქსესუარების მაღაზიებშიც შესაძლებელია. თავად „ბუერა“ თავის მომხმარებლებს სხადასხვა სიურპრიზებს უწყობს, სოციალურ ქსელში კონკურსებს ატარებს და გამარჯვებულებს აქსესუარებით ასაჩუქრებს. „ბუერას“ საიდუმლო ბევრისთვის ცნობილია, რადგან ეს საიდუმლო მჟღავნდება მაშინ, როდესაც შენთვის სასურელ ნივთს ხედავ ზუსტად ისეთს, როგორსაც წარმოიდგენდი. მომხმარებლებთან ინდივიდუალური მიდგომით, აზრთა გაცვლა-გამოცვლით, პროფესიონალიზმით, კრეატიულობით და საქმისადმი გულმოდგინეობით „ბუერამ“ თავი ყველას შეაყვარა. ეს ფაქტი მაიას და თეონას ძალიან ახარებთ, სოციალურ ქსელში იღებენ მადლიერების წერილებს, მათით დაინტერესდნენ სხვადასხვა ტელევიზიები, ჟურნალ-გაზეთები. ეს ყველაფერი მათ მეტ სტიმულს აძლევს, უხარიათ და ეამაყებათ. „ამით ყველაზე მეტად ვამაყობთ. კიდევ ვამაყობთ, იმით რომ ვცდილობთ დავანგრიოთ სტერეოტიპი, ნაკლებშემოსავლიანი საქმის შესახებ. რა თქმა უნდა, „ბუერა“ არ არის ქერის ორმო, მაგრამ განვითარების ამ ეტაპზე შეგვიძლია ვივარაუდოთ, რომ თუ საქმეს სიყვარულით და დიდი მონდომებით აკეთებ, აუცილებლად შეძლებ ყველაზე მცირე თავი ირჩინო. თუნდაც ეს იყოს საქართველო და თუნდაც ეს იყოს დიასახლისის მიერ 24 საათში გამოძებნილი 25-ე საათი, როცა მას შეუძლია გააკეთოს სახლის საქმის გარდა რაღაც სხვა.“
15.09.14
ნათია კეკენაძე