ამერიკის შეერთებულ შტატებში პოლიტიკური გადაწყვეტილებები უკვე მიღებულია იმის თაობაზე, რომ საქართველოს თავდაცვისუნარიანობა ამაღლდეს, – ამის შესახებ ჟურნალისტებს, მთავრობის დღევანდელი სხდომის შემდეგ საქართველოს თავდაცვის მინისტრმა, ირაკლი ალასანიამ განუცხადა.
მისივე განმარტებით, აღნიშნული გადაწყვეტილების ფარგლებში გათვალისწინებულია ბევრი საკითხი, მათ შორის მოძველებული ვერტმფრენების პარკის განახლება.
“ამერიკის შეერთებული შტატების თავდაცვის მდივანის მიერ ჩვენს ქვეყანაში სტუმრობის დროს გაკეთებული განცხადება, გაუხსნიან საქართველოს მოთხოვნების შესრულების შესაძლებლობა, ნიშნავს, რომ აშშ-ში უკვე მიღებულია პოლიტიკური გადაწყვეტილებები, ამაღლდეს საქართველოს თავდაცვისუნარიანობა. მათ შორის ერთ-ერთია ვერტმფრენების გადმოცემა-შესყიდვის საკითხი, რომელიც ჩვენ ძალიან გვჭირდება. ბუნებრივია, ეს არის ჩვენი საჰაერო პარკის განვითარების და განახლების გეგმასთან შესაბამისობაში”, – განაცხადა ალასანიამ.
თავდაცვის მინისტრის განმარტებით, არის სხვა საკითხებიც, რომელთა გადაწყვეტას უახლოეს პერიოდში ელოდებიან.
“მთავარია, არსებობს პოლიტიკური გადაწყვეტილება, რომელიც მეტყველებს, რომ აშშ ჩაერთვება საქართველოს თავდაცვისუნარიანობის გაზრდაში”, – აღნიშნა ალასანიამ.
ამერიკის შეერთებული შტატების საგარეო ურთიერთობათა კომიტეტმა მიიღო კანონპროექტი, რომელიც ნატო-ს წევრობის გარეშე საქართველოს, უკრაინასა და მოლდოვას აშშ-ის მთავარ პარტნიორად აღიარებს.
ბარაკ ობამამ კი პეტრო პოროშენკოსთან შეხვედრის შემდეგ განაცხადა, რომ უკრაინა, როგორც ნატო-ს არაწევრი ქვეყანა, აშშ-ის მთავარი პარტნიორის განსაკუთრებულ სტატუსს არ მიიღებს, რადგან უკვე აქვს აშშ-სთან თანამშრომლობის მსგავსი სტატუსი.
დოკუმენტის ძალაში შესვლამდე ჯერ მთელი რიგი პროცედურაა გასავლელი, მათ შორის დოკუმენტი უნდა შევიდეს წარმომადგენლობით პალატაში, შემდეგ დაბრუნდეს ისევ სენატში, გადაეგზავნოს აშშ-ის პრეზიდენტის ადმინისტრაციას და მხოლოდ პრეზიდენტის მიერ მასზე ხელმოწერის შემთხვევაში გახდება მისი შესრულება სავალდებულო.
19.09.14