უკრაინის კრიზისის გამო, დასავლეთსა და რუსეთს შორის არსებული დაპირისპირების პირობებში, სომხეთი ჩაურევლობის პოლიტიკას ადგას, რადგან ერთი მხრივ, სტრატეგიული და ეკონომიკური ურთიერთობა აქვს რუსეთთან; მეორე მხრივ კი „მშვენიერი ურთიერთობა” აქვს ამერიკასთან, ევროკავშირთან და ნატოსთან-ამის შესახებ სომხეთის პრეზიდენტმა სერჟ სარქსიანმა იტალიაში ყოფნისას განაცხადა.
იტალიური გამოცემისთვის მიცემულ ინტერვიუში სარქსიანმა აღნიშნა, რომ რადგან არსებობს მთიანი ყარაბაღის გადაუჭრელი პრობლემა, ოფიციალური ერევანი ისეთ ვითარებაში, როდესაც ”ერების თვითგამორკვევაზეა” საუბარი, მსგავსი შეხედულებების მხარეს უჭერს. მაგალითად, მარტში სომხეთმა, რუსეთის მსგავსად, ყირიმში ჩატარებული რეფერენდუმის არალეგიტიმურად აღიარების შესახებ, გაეროს გენერალური ასამბელის რეზოლუციას მხარი არ დაუჭირა. პრეზიდენტის თქმით, სომხეთი ასე რუსეთის გამო არ მოქცეულა.
სარქსიანის თქმით, ყველა ქვეყანამ პატივი უნდა სცეს ერების თვითგამორკვევას არა მხოლოდ მსხვილი „ტერიტორიული ფორმირებების”, არამედ უფრო მცირე ტერიტორიების შემთხვევაშიც.
„გავიხსენოთ კოსოვოს დამოუკიდებლობა. მთიან ყარაბაღსა და კოსოვოს შორის განსხვავება არ არის,”-განაცხადა სარქსიანმა Corriere della Sera-სთვის მიცემულ ინტერვიუში.
23.09.14
