საქართველოს რეგიონული განვითარებისა და ინფრასტრუქტურის მინისტრის მოადგილე, თენგიზ შერგელაშვილი უკრაინაში გაემგზავრა. მინისტრის მოადგილე, 15-მდე ევროპული ქვეყნის მაღალი დონის ოფიციალურ პირებთან ერთად, კონფერენციაში – „მუნიციპალური კონსოლიდაცია ევროპაში: მუნიციპალიტეტთა გაერთიანებისა და თანამშრომლობასთან დაკავშირებული ტენდენციები და მათთან დაკავშირებული პრობლემების გადაჭრის გზები“ მიიღებს მონაწილეობას. ღონისძიებას უკრაინის პრეზიდენტი, პეტრო პოროშენკო გახსნის.
უკრაინის მთავრობა მუნიციპალიტეტთა გაერთიანებისა და მუნიციპალიტეტთაშორისი თანამშრომლობის კუთხით ამბიციური რეფორმის განხორციელებას გეგმავს, რომლის მიზანიც უკრაინაში არსებული ადგილობრივი თვითმმართველობების რაოდენობის შემცირება და მათი კონსოლიდირებაა. კონფერენციაში მონაწილე ევროპული ქვეყნების წარმომადგენლები, ორდღიანი მუშაობის შედეგად, უკრაინის მთავრობას წარუდგენენ ნათლად გაწერილ სახელმძღვანელო პრინციპებს მის მიერ მუნიციპალური კონსოლიდაციის რეფორმის დაგეგმვისა და განხორციელებისათვის.
აღსანიშნავია, რომ ევროპის დიდმა ქვეყნებმა განახორციელეს, ახორციელებენ ან გეგმავენ, რომ განახორციელონ მსგავსი სახის რეფორმები. ევროპის დემოკრატიისა და მმართველობის კომიტეტმა (CDDG) გადაწყვიტა, რომ შეექმნა სახელმწიფოთა „ჯგუფები“, რომელებიც მუნიციპალიტეტთა გაერთიანების საკითხით დაინტერესებულნი არიან და ერთმანეთის გამოცდილების გაზიარების მიზნით შეხვედრებს მართავენ.
25-26 სექტემბერს კიევში დაგეგმილი ღონისძიების ორგანიზატორი უკრაინის რეგიონული განვითარების, მშენებლობისა და მუნიციპალური ეკონომიკის სამინისტროა. პროექტი ევროსაბჭოსთან თანამშრომლობით ხორციელდება.
24.09.14
