ე.წ. ბოშების ბაზრობაზე დღეს ხმაური იყო. დაზარალებული მოვაჭრეები მერიას დაპირების შეუსრულებლობაში ადანაშაულებენ. საპროტესტო აქცია დილიდან მიმდინარეობს, ერთ-ერთი მოვაჭრე აქციის დროს ცუდად გახდა.
მოვაჭრეები კრედიტების გადავადებას და დამწვარი ინფრასტრუქტურის აღდგენას ითხოვენ. მოვაჭრეები აცხადებენ, რომ ამის შესახებ პირობა მათ თავად დავით ნარმანიამ მისცა.
“გუშინ გამოგვიცხადე,ს რომ ბანკმა არ დაადასტურა ეს დახმარება. არც ადგილი ჩანს, არც დახმარება ჩანს, საერთოდ არაფერი ჩანს და რა გავაკეთოთ ჩვენ? ნარმანია იყო მოსული, გამგებელი იყო მოსული, დეპუტატი იყო მოსული, მეტი ვინღა უნდა მოსულიყო. პრემიერმინისტრი უნდა მოვიდეს? ადამიანი უნდა მოკვდეს და მერე უნდა მოგვაქციონ ყურადღება?” – აცხადებს დაზარალებული.
“16-ში დაიწვა ბაზარი და დღემდე ხედავთ ამ ტერიტორიას, რომ არაფერია გაკეთებული. ჩვენს უკან ჩვენი ოჯახებია, ბანკების ვალები გვაქვს, დღიური სესხები გვაქვს, როგორ გავუმკლავდეთ ამ ყველაფერს?” – აცხადებს დაზარალებული.
ვაგზლის მიმდებარე ტერიტორიაზე ე.წ. ბოშების ბაზარს ხანძარი 16 სექტემბერს გაუჩნდა. ცეცხლი ახლომდებარე სახლებზეც გადავიდა.
24.09.14
