სასამართლომ ოპერისა და ბალეტის თეატრის სამხატვრო ხელმძღვანელი ადმინისტრაციულ სამართალდამრღვევად ცნო, – ამის შესახებ “თბილისი თაიმსს” სახალხო დამცველის აპარატიდან აცნობეს.
მათივე ინფორმაციით, 2014 წლის 9 სექტემბერს სახალხო დამცველის კანონიერი მოთხოვნის შეუსრულებლობის გამო, თბილისის საქალაქო სასამართლომ თბილისის ზაქარია ფალიაშვილის სახელობის ოპერისა და ბალეტის პროფესიული სახელმწიფო თეატრის სამხატვრო ხელმძღვანელი დავით კინწურაშვილი ადმინისტრაციულ სამართალდამრღვევად ცნო და სახდელის ზომად, სახელმწიფო ბიუჯეტის სასარგებლოდ, 800 ლარის ოდენობით ჯარიმა შეუფარდა.
“საქართველოს სახალხო დამცველის აპარატმა თბილისის ოპერისა და ბალეტის თეატრის ყოფილი თანამშრომლის, იური საროკინის სამსახურიდან გათავისუფლების კანონიერების შესწავლის მიზნით, თეატრიდან წერილობით გამოითხოვა საქმისათვის მნიშვნელობის მქონე ინფორმაცია. თბილისის ოპერისა და ბალეტის თეატრის სამხატვრო ხელმძღვანელმა დაარღვია კანონის მოთხოვნა და საქმისწარმოებისათვის საჭირო დოკუმენტაცია სახალხო დამცველის აპარატს არ მიაწოდა. საქართველოს სახალხო დამცველის შესახებ ორგანული კანონი ადგენს, რომ მასალა, საბუთი, სხვა ინფორმაცია და ახსნა-განმარტება საქართველოს სახალხო დამცველს უნდა გადაეცეს მოთხოვნის მიღებისთანავე, გარდა იმ შემთხვევისა, როდესაც მასალა, საბუთი და სხვა ინფორმაცია მოთხოვნილია წერილობითი მიმართვის საფუძველზე. ასეთ შემთხვევაში საბუთი და სხვა ინფორმაცია საქართველოს სახალხო დამცველს უნდა გადაეცეს 10 დღის ვადაში”, – განმარტავენ ომბუდსმენის აპარატში.
მათივე ინფორმაციით, კანონმდებლობით დადგენილი ვადის გასვლის შემდეგ, საქართველოს სახალხო დამცველმა მინიჭებული უფლებამოსილების ფარგლებში მიმართა თბილისის საქალაქო სასამართლოს და სახალხო დამცველის კანონიერი მოთხოვნის შეუსრულებლობის გამო, სამხატვრო ხელმძღვანელის მიმართ ადმინისტრაციული წესით სანქციის გამოყენება მოითხოვა.
25.09.14
