გაერო-ს განვითარების პროგრამის (UNDP) ხელმძღვანელი ჰელენ კლარკი ვიზიტის ფარგლებში საქართველოს პრეზიდენტს გიორგი მარგველაშვილს , პრემიერ-მინისტრს ირაკლი ღარიბაშვილს და საგარეო საქმეთა მინისტრს მაია ფანჯიკიძეს შეხვდა.
როგორც “თბილისი თაიმსს” საგარეო საქმეთა სამინისტროდან აცნობეს, მხარეებმა განიხილეს კლარკის საქართველოში ბოლო ვიზიტიდან განვლილ პერიოდში, ქვეყნის განვითარების კუთხით გადადგმული ნაბიჯები, მათ შორის ქვეყანაში გამართული საპრეზიდენტო და ადგილობრივი არჩევნები, ევროკავშირთან ხელმოწერილი ასოცირების შეთანხმება და ღრმა და ყოვლისმომცველი თავისუფალი ვაჭრობის შეთანხმება, ასევე საქართველოს და UNDP-ს შორის თანამშრომლობის კონკრეტული პროექტები.
საქართველოს პრემიერ-მინისტრთან შეხვედრის დასრულების შემდეგ გაეროს განვითარების პროგრამის ადმინისტრატორმა და საქართველოს საგარეო საქმეთა მინისტრმა მედიის წარმომადგენლებთან განცხადებები გააკეთეს.
ჰელენ კლარკმა საქართველოს ევროკავშირთან ასოცირების შეთანხმების ხელმოწერა მიულოცა და აღნიშნა ცალკეული მიმართულებით საქართველოს მთავრობის მიერ გატარებული რეფორმები.
“ძალიან მოხარული ვარ, რომ ერთი წლის შემდეგ ისევ ჩამოვედი საქართველოში, ჩემი გასული ვიზიტი შედგა 2013 წლის თებერვალში. საქართველოს უკვე ჰყავს ახალი პრემიერ-მინისტრი, ახალი პრეზიდენტი და ეს დიდ შესაძლებლობაა ჩემთვის და გაეროს მაღალი თანამდებობის პირებისთვის რომ კიდევ ერთხელ განგვეახლებინა ძალიან კარგი ურთიერთობა საქართველოს მთავრობასთან. შეხვედრების ფარგლებში ბევრი საკითხი განვიხილეთ და აღსანიშნავია, რომ საქართველომ წინ გადადგა სერიოზული ნაბიჯები. ჩვენ ვულოცავთ ქვეყანას ევროკავშირთან ასოცირების შეთანხმების ხელმოწერას და ასევე თავისუფალი სავაჭრო სივრცის შეთანხმების ხელმოწერას. ჩვენ განვიხილეთ ის პროგრამები რომლებსაც გაეროს განვითარების პროგრამა და გაეროს სხვა სააგენტოები ასრულებენ საქართველოში. მათ შორის შევეხეთ გაეროს განვითარების პროგრამისა და გაეროს მუშაობას აფხაზეთის ოკუპირებულ რეგიონში და იმ წვლილს, რომელიც ჩვენ შეიძლება შევიტანოთ კონფლიქტების მშვიდობიანად მოგვარების საქმეში. ძალიან მოხარული ვარ, რომ საქართველო ასრულებს მნიშვნელოვან რეფორმებს. განსაკუთრებით მოხარულები ვართ იმით, რომ ქვეყანაში ხორციელდება ინკლუზიური განვითარების პოლიტიკა ანუ ისეთი განვითარების რომელიც აისახება ქვეყნის ყველა მოქალაქეზე. დიდ სიხარულით შევეგებეთ იმ ფაქტს, რომ საქართველომ მიიღო ადამიანის უფლებებთან დაკავშირებით ყოვლისმომცველი სტრატეგია. რომელიც საქართველოს განვითარების ქვაკუთხედი იქნება. განსაკუთრებით ეს აისახება სამუშაო ადგილების შექმნაზე, დასაქმების გაზრდასა და განათლების განვითარებაზე”, – განაცხადა ჰელენ კლარკმა.
როგორც გაეროს განვითარების პროგრამის ხელმძღვანელმა აღნიშნა, მან საქართველოს მთავრობას შესთავაზა პარტნიორობის ახალი გეგმა, რომელიც მთავრობის მიერ დასახულ პრიორიტეტებს ეფუძნება.
საქართველოს საგარეო საქმეთა მინისტრმა, მაია ფანჯიკიძემ მადლობა გადაუხადა გაეროს განვითარების პროგრამის ადმინისტრატორს საქართველოსთან თანამშრომლობისათვის, განსაკუთრებით კი ოკუპირებულ რეგიონებში გაწეული საქმიანობისთვის.
“საქართველოს პრემიერ-მინისტრმა და მეც ჩემის მხრივ, მადლობა გადავუხადეთ ქალბატონ ჰელენ კლარკს, იმ მნიშვნელოვანი საქმიანობისთვის, რასაც გაეროს განვითარების პროგრამა ეწევა აფხაზეთის ოკუპირებულ რეგიონში და საოკუპაციო ხაზის გასწვრივ მდებარე სოფლებში. ეს ყველაფერი ემსახურება ადგილობრივი მოსახლეობის ჰუმანიტარული მდგომარეობის გაუმჯობესებას. ჩვენ იმედი გამოვთქვით, რომ თანამშრომლობა კიდევ უფრო გაღრმავდება და ის პროგრამები, რაც ხორციელდება აფხაზეთში შეიძლება მომავალში განხორციელდეს ცხინვალის რეგიონშიც”, – განაცხადა მაია ფანჯიკიძემ.
ჰელენ კლარკი საქართველოს პირველად 2013 წლის თებერვალში ეწვია. მაშინ მან გაეროს განვითარების პროგრამის სახელით დაადასტურა საქართველოში მიმდინარე რეფორმების მხარდაჭერა და ქვეყანას ამ მიმართულებით დახმარება აღუთქვა.
გაეროს განვითარების პროგრამის დელეგაციაში ასევე შედიოდნენ UNDP-ის რეგიონული ბიუროს ხელმძღვანელი ჯიჰან სულთანოღლუ და UNDP-ის მუდმივი წარმომადგენელი საქართველოში ნილს სკოტი.
01.10.14