მირზა ბუჩუაძის მკვლელობაში ბრალდებულ ლაშა ჯიხვაშვილს ქუთაისის საქალაქო სასამართლომ ორთვიანი წინასწარი პატიმრობა შეუფარდა.
პროცესი დასრულებულია, სასამართლოს გადაწყვეტილებას დაცვის მხარე გაასაჩივრებს. ადვოკატები ჯიხვაშვილისთვის ათი ათასლარიანი გირაოს შეფარდებას ითხოვდნენ.
საქმეზე წინასასამართლო სხდომა 24 ნოემბერს ჩაინიშნა.
შემთხვევა, რომელსაც მირზა ბუჩუაძის სიცოცხლე ემსხვერპლა, ქუთაისში სამი დღის წინ მოხდა. თვითმხილველთა განცხადებით, ბუჩუაძე მანქანით მოძრაობდა. პოლიციამ გაჩერება მოსთხოვა. ხოლო ეს უკანაკსნელი იმის გამო, რომ მართვის მოწმობა არ ჰქონდა, გაიქცა, რასაც მისი მისამართით გასროლა მოჰყვა. ბუჩუაძის გარდაცვალების ფაქტზე პროკურატურამ ერთი სამართალდამცველი დააკავა.
ქალაქის პოლიციის N2 განყოფილების ყოფილ თანამშრომელს ლაშა ჯიხვაშვილს პროკურატურამ ბრალი ორი მუხლით წაუყენა. საუბარია სისხლის სამართლის კოდექსის 108-ე და 333-ე მუხლებზე, რაც განზრახ მკვლელობასა და უფლებამოსილების გადამეტებას გულისხმობს იარაღის გამყენებით. დანაშაული 7-დან 15 წლამდე პატიმრობას ითვალისწინებს.
06.10.14
