თბილისის რიგით მე-17 ჯაზფესტივალი 23-27 ოქტომბერს თბილისის დიდ საკონცერტო დარბაზში გაიმართება. ამასთან დაკავშირებით, კულტურისა და ძეგლთა დაცვის მინისტრმა მიხეილ გიორგაძემ, თბილისის მერმა დავით ნარმანიამ, “ისტერნ პრომოუშენის” დირექტორმა გიორგი კერესელიძემ და “თი-ბი-სი” ბანკის საგარეო ურთიერთობათა და მედიაკომუნიკაციების დირექტორმა თამარ კირვალიძემ ბრიფინგი გამართეს.
მე-17 ჯაზფესტივალში ტრადიციულად მსოფლიოში აღიარებული მუსიკოსები არიან მოწვეული: როი ეიერსი, ალ დი მეოლა, დევიდ ფიუზინსკი, სტენლი კლარკის ბენდი, მიშელ კამილოს ტრიო, ენდი შეპარდის კვარტეტი, ჯორჯ მელის კვარტეტი და ანა კოენის კვარტეტი. უცხოელ ვარსკვლავებთან ერთად ფესტივალში მონაწილეობას ქართველი ახალგაზრდა მუსიკოსები მიიღებენ.
სტენლი კლარკი ახალგაზრდა ქართველ მუსიკოს ბექა გოჩიაშვილთან ერთად ევროტურს საქართველოში სწორედ ჯაზფესტივალის ფარგლებში იწყებს. დევიდ ფიუზინსკისთან ერთად დაუკრავს პიანისტი გიორგი მიქაძე, ნიუ-იორკიდან სპეციალურად თბილისის ჯაზფესტივალისთვის ჩამოდის ასევე ქართველი ჯაზშემსრულებელი გიორგი მელიქიშვილი, რომელიც 20 წლის შემდეგ თავის კვარტეტთან ერთად პირველად წარსდგება ქართველი მსმენელის წინაშე. წელს პირველად ჯაზფესტივალის ფარგლებში თბილისის საკონცერტო დარბაზის ფოიეში გაიმართება ქართველი მხატვრის დავით მჭედლიშვილის ნამუშევრების გამოფენა-გაყიდვა სახელწოდებით All that Jazz. ეროვნული გალერეა კი ფრანგი ფოტოგრაფის კრისტიან როზეს უნიკალური ნამუშევრების გამოფენას უმასპინძლებს.
“23 ოქტომბრს თბილისის მე-17 საერთაშორისო ჯაზფესტივალი იწყება. ეს ის ჯაზფესტივალია, რომელსაც ერთ-ერთი ყველაზე ხანგრძლივი და უწყვეტი ტრადიცია აქვს, რაც უაღრესად დიდ ავტორიტეტს და სტატუსს გვმატებს საერთაშორისო არენაზე. ეს ასევე ძალიან მნიშვნელოვანია ქალაქისა და ქვეყნისთვის, რადგან კარგი საშუალებაა მათი პრომოუტირების საერთაშორისო არენაზე”, – განაცხადა კულტურის მინისტრმა მიხეილ გიორგაძემ.
თბილისის მერის, დავით ნარმანიას თქმით კი, ასეთი ღონისძიებების ჩატარება თბილისს ხელს უწყობს რეგიონულ კულტურულ ცენტრად ჩამოყალიბებაში.
“მნიშვნელოვანია ჯაზფესტივალის თბილისში ჩატარება. მეტი ვიზიტორი ჩამოდის ღონისძიებისთვის, მნიშვნელოვანია, რომ უცხოელ მუსიკოსებთან ერთად მონაწილეობას ქართველი მუსიკოსებიც მიიღებენ, ასეთი ღონისძიებები უფრო მეტად ხელს უწყობს თბილისის რეგიონის კულტურულ ცენტრად ჩამოყალიბებაში, რისი ამბიციაც ჩვენ სრულიად საფუძვლიანად გვაქვს, – განაცხადა დავით ნარმანიამ.
დღევანდელი პრესკონფერენციის დასასრულს, სოლიდარობის ფონდსა და “ისთერნ პრომოუშენს” შორის მემორანდუმი გაფორმდა.
10.10.14
