19 წლის იოსებ გიორხელიძის გატაცებაში ბრალდებულ პირებს სასამართლომ აღკვეთის ღონისძიებად წინასწარი პატიმრობა შეუფარდა.
ერთერთი დაკავებულის ალექსანდრე ჭანტურიას ადვოკატმა ვლადიმერ კიკნაძემ პროცესის დაწყებამდე ჟურნალსიტებთან კომენტარი გააკეთა. მან თქვა, რომ მისი დაცვის ქვეშ მყოფმა დანაშაული აღიარა. დაცვის მხარე მის გირაოთი გათავისუფლებას ითხოვდა, გირაოს თანხად კი 10 000 ლარი დაასახელეს.
„დანაშაულს აღიარებს. სხვადასხვას სხვადასხვა მოტივი ჰქონდა. მე ოთხივეს არ ვიცავ, ჭანტურიას ვიცავ“,-განაცხადა ვლადიმერ კიკნაძემ.
ჭანტურიას გარდა, დანარჩენ სამ ბრალდებულს ადვოკატი არ ჰყოლიათ.
პროკურატურა დაკავებულებისთვის აღკვეთის ღონისძიებად პატიმრობის შეფარდებას ითხოვდა.
შეგახსენებთ, შსს-ს ცენტრალური კრიმინალური პოლიციის დეპარტამენტის, თბილისის მთავარი სამმართველოს და გენერალური პროკურატურის თანამშრომლებმა კომპლექსური ოპერატიულ-საგამოძიებო ღონისძიებების შედეგად ყოფილი კონსტიტუციური უსაფრთხოების დეპარტამენტის ანუ კუდის თანამშრომელი – 1962 წელს დაბადებული დურმიშხან ღვაჩლიანი, ყოფილი სპეციალური ოპერატიული დეპარტამენტის ანუ სოდის თანამშორმელი – 1977 წელს დაბადებული ჯემალ შონია, ასევე 1983 წელს დაბადებული ალექსანდრე ჭანტურია და 1978 წელს დაბადებული გიორგი ქალდანი ანგარებით, ადამიანის მძევლად ხელში ჩაგდების ფაქტზე დააკავეს.
15.10.14
