Facebook
საქართველოს ფინანსთა მინისტრმა, ნოდარ ხადურმა სამუშაო შეხვედრა გამართა დუშეთის მუნიციპალიტეტში, სადაც შეხვდა დუშეთის მაჟორიტარ დეპუტატსა და ადგილობრივი ხელისუფლების წარმომადგენლებს.
ფინანსთა სამინისტროს ცნობით, გაეცნო რეგიონის ინფრასტრუქტურულ და მუნიციპალურ პროექტებს, საფინანსო სამსახურების მუშაობას.
,,სამწუხაროდ, წლების განმავლობაში ბევრი პრობლემა დაგროვდა დუშეთის რაიონში. მე ჩამოვედი მაჟორიტარი დეპუტატის, ირაკლი ტრიპოლსკის თხოვნით და ადგილზე გავეცანი ვითარებას. არის ბევრი ინფრასტრუქტურული პრობლემა, მთლიანად მოსაწესრიგებელია წყალგაყვანილობისა და კანალიზაციის სისტემები. წელს ჩვენ რეგიონული განვითარებისა და ინფრასტრუქტურის სამინისტროსთან ერთობლივი მუშაობის შედეგად გამოვყავით 4 მლნ. 700 ათასი ლარი. მიმდინარეობს პროექტირება და იმედი მაქვს, რომ წელს ბევრი სასიკეთო პროექტი განხორციელდება რეგიონში. სამომავლოდ ვმუშაობთ იმისათვის, რათა სხვა პრობლემებიც გადაიჭრას“ – განაცხადა ნოდარ ხადურმა.
მინისტრმა სამუშაო შეხვედრების დროს დაათვალიერა ის პროექტები, რომელთა განხორციელებაც განსაკუთრებით მნიშვნელოვანია რაიონის მოსახლეობისათვის. ესენია: დუშეთის ხევზე ხიდებისა და ნაპირსამაგრი ჯებირების რეაბილიტაცია; დუშეთის ნაგავსაყრელისა და ჟინვალის კოლექტორის გაწმენდითი სამუშაოები; ძველი დუშეთის უბნების აღდგენა-რეკონსტრუქცია.
როგორც დუშეთის მაჟორიტარმა დეპუტატმა, ირაკლი ტრიპოლსკიმ განაცხადა, აღნიშნული პრობლემების დროული მოგვარება რაიონისათვის აუცილებელია და იმედი გამოთქვა, რომ შესაბამისი თანხები გამოიყოფა და სამუშაოები წელსვე დაიწყება.
08.05.13
