საქართველოს სოლიდარობის ფონდის აღმასრულებელმა დირექტორმა მარიამ ჯაშმა პრემიერ-მინისტრის მრჩეველ სავალან მირზოევთან ერთად პირველი გასვლითი შეხვედრები გამართა ქვემო ქართლში.
შეხვედრებს ესწრებოდნენ სახელმწიფო რწმუნებულის აპარატის, ქვემო ქართლის რაიონების მუნიციპალიტეტების, განათლების სამსახურებისა და დმანისის სახანძრო სამსახურის თანამშრომლები, რომლებიც უკვე შეუერთდნენ სოლიდარობის ფონდს ყოველთვიური ნებაყოფლობითი მცირე დონაციებით.
მარნეულში და დმანისში გამართულ შეხვედრებზე მარიამ ჯაშმა თითოეულ მხარდამჭერს მადლობა გადაუხადა სასიცოცხლოდ მნიშვნელოვანი თანადგომისათვის და გააცნო დეტალური ინფორმაცია დღეისათვის ფონდის მიერ მობილიზებული რესურსებისა და მხარდაჭერილი ბენეფიციარების შესახებ.
„ქვემო ქართლის მუნიციპალიტეტების ჩართულობა, 300-მდე მასწავლებლისა და სახანძრო სამსახურის ათამდე თანამშრომლის მხარდაჭერა საზოგადოების სოლიდარობის გამოხატულების უმნიშვნელოვანესი მაგალითია. დღევანდელი შეხვედრის მონაწილეებმა ქვეყნის მასშტაბით 35,000 საჯარო მოხელესთან ერთად უკვე შექმნეს საზოგადოების ერთობლივი ძალისხმევით სოციალური პრობლემების გადაჭრის პირველი საფუძვლები. სიმბოლურია, რომ დღეისთვის ფონდის მიერ დაფინანსებული 25 ბავშვიდან ერთ-ერთი მარნეულის რაიონში მცხოვრები 6 წლის ბავშვია,“ – განაცხადა მარიამ ჯაშმა.
ფონდის აღმასრულებელმა დირექტორმა ასევე აღნიშნა, რომ საყოველთაო ჯანდაცვისა და სოლიდარობის ფონდის პროგრამებით საქართველოში 22-წლამდე ასაკის ონკოლოგიურ პაციენტთა დაფინანსების პრობლემა უკვე გადაჭრილია და საზოგადოების მზარდი ჩართულობით სოლიდარობის ფონდი 2015 წლის გაზაფხულიდან ეტაპობრივად შესძლებს პროგრამების გაფართოებას შეზღუდული შესაძლებლობებისა და იშვიათი დაავადებების მქონე ბავშვების დასახმარებლად.
4 ნოემბრის მონაცემებით საქართველოს სოლიდარობის ფონდში მობილიზებულია 1 080 000 ლარი. აღნიშნული თანხიდან 479 000 ლარი უკვე დამტკიცებულია ონკოლოგიური დაავადების მქონე 25 ბავშვისა და ახალგაზრდის დიაგნოსტიკისა და მკურნალობისთვის, მათ შორის 8 ბავშვის საზღვარგარეთ სამკურნალოდ.
04.11.14
