პრემიერ-მინისტრისა და მინისტრების დღევანდელ შეხვედრაზე, სავარაუდოდ, მთავრობის ახალი წევრების კანდიდატურებიც იქნება განხილული. ამის შესახებ ჟურნალისტებს განათლების და მეცნიერების მინისტრმა თამარ სანიკიძემ განუცხადა.
“ვფიქრობ, ნაწილობრივ იმისთვისაც ვიკრიბებით, რომ მინისტრობის ახალი კანდიდატების საკითხიც განვიხილოთ, მაგრამ მთავარ თემად რჩება ის, რაც მოხდა უკანაკსნელი დღეების განმავლობაში”, – განაცხადა თამარ სანიკიძემ.
რაც შეეხება ევროპულ კურსს, სანიკიძის განმარტებით, ეს არის ჩვენი ხალხის არჩევანი და ამ კურსთან დაკავშირებით მიღებულ გადაწყვეტილებასთან ერთეული ადამიანები თავს არ უნდა აიგივებდნენ.
“ძალიან ბევრი რამ გაკეთდა ცალკეულ უწყებაში იმისთვის, რომ ჩვენი ევროპასთან ინტეგრაცია მოხდეს სწრაფად და დროულად. ეს არის იდეა, რომლის ირგვლივაც ყველანი ვართ გაერთიანებული. არავითარი შეფერხება ამ კუთხით არ გვქონია. შესაბამისად, აქ კითხვის ნიშნების დასმა შეუძლებელია. კურსიდან არავითარი გადახვევა არ იგეგმება. ეს არის ჩვენი ხალხის არჩევანი და ამ კუთხით მიღებულ პოლიტიკურ გადაწყვეტილებასთან ერთეული ადამიანები თავს ნამდვილად არ უნდა აიგივებდნენ”, – განაცხადა სანიკიძემ.
პრემიერთან სამუშაო შეხვედრა მთავრობის წევრებთან ამ წუთებში იწყება.
06.11.14