შინაგან საქმეთა სამინისტროს ყოფილ მაღალჩინოსანთან ოლეგ მელნიკოვთან კიდევ ერთი საპროცესო შეთანხმება გაფორმდა. მოსამართლემ პროკურატურის შუამდგომლობა დღეს დააკმაყოფილა და ე.წ. მოდულის შენობაში სამი პოლიციელის ცემის ფაქტზე მას ორი წლით პატიმრობა და ორი წლით გამოსაცდელი ვადა, ანუ პირობითი მსჯავრი შეუფარდა.
მელნიკოვი დამნაშავედ სამსახურებრივი უფლებამოსილების გადამეტებაშია ცნობილი. ამ მუხლის საფუძველზე, მას 5 წლით თავისუფლების აღკვეთა შეეფარდა, თუმცა ამინისტიის საფუძველზე პატიმრობა 3 წლითა და 9 თვით განესაზღვრა. საპროცესო პირობების თანახმად კი, ორი წლით პატიმრობა და 1 წლითა და 9 თვით პირობითი მსჯავრი შეეფარდა.
„ბრალდების მხარემ ოლეგ მელნიკოვთან მოახდინა საპროცესო შეთანხმების გაფორმება, იმის გათვალისწინებით, რომ იგი აღიარებს, ინანიებს ჩადენილ დანაშაულს. შესაბამისად, ჩვენ მიერ წარმოდგენილ იქნა შუამდგომლობა სააპელაციო სასამართლოში. სასამრთლომ იმსჯელა წარმოდგენილ შუამდგომლობაზე და დაამტკიცა ჩვენს მიერ წარმოდგენილი პირობები“,-განაცხადა პროკურორმა ლევან ბაჩიაშვილმა.
პროცესის დამთავრების შემდეგ ჟურნალისტებმა მელნიკოვის ადვოკატს ვარლამ ვალხამიშვილი ჰკითხეს, გათავისუფლდება თუ არა ახალ წლამდე მელნიკოვი.
„ახალ წლამდე უწევს წესით, მაგრამ მაგას თავის ვადები უნდა“,-განაცხადა ადვოკატმა.
მელნიკოვთან საპროცესო შეთანხმების გაფორმებით უკმაყოფილოა კონსტიტუციური უსაფრთხოების დეპარტამენტის ყოფილი უფროსის დათა ახალიას ადვოკატი ირაკლი ზაქარეიშვილი.
„ყველაფერი გაკეთდა იმისთვის, რომ საქალაქო სასამართლოს მიერ გამართლებული დავით ახალაიას მიმართ შეიცვალოს გამამართლებელი განაჩენი და დაუდგინდეს გამამტყუნებელი განაჩენი. ასეთი ბინძური და მარტივი მეთოდებით მოქმედებს პროკურატურა, რასაც, სამწუხაროდ, თავისი გადაწყვეტილებით მხარი აუბა სააპელაციო სასამართლოს მოსამართლემ“,-განაცხადა ზაქარეიშვილმა.
შეგახსენებთ, საპროცესო შეთანხმება მელნიკოვთან სექტემბერში სანდრო გირგვლიანის საქმეზეც გაფორმდა.
ცნობისთვის, უკრაინაში, კიევში უკრაინის სამართალდამცავებმა მელნიკოვი 2012 წლის 7 დეკემბერს დააკავეს.
2013 წლის სექტემებრში თბილისის საერთაშორისო აეროპორტში რეისით კიევი-თბილისი, ბორისპოლის აეროპორტიდან ოლეგ მელნიკოვის საქართველოში ექსტრადიცია განხორციელდა.
შეგახენებთ, დათა ახალაიას, ოლეგ მელნიკოვს, გერონტი ალანიასა და სოსო თოფურიძეს 2005 წელს ე.წ. მოდულის შენობაში პოლიციელების ცემის ფაქტთან დაკავშირებულ ბრალდებაზე სასამართლომ 3 წლითა და 9 თვით თავისუფლების აღკვეთა შეუფარდა.
12.11.14
