“თავისუფალი დემოკრატების” ერთ-ერთი ლიდერი ალექსი პეტრიაშვილი, დავით საგანელიძის მიერ აუდიტის სამსახურიდან და პროკურატურურიდან თავდაცვის სამინისტროსთან დაკავშირებული მასალების მოთხოვნას, ირაკლი ღარიბაშვილის გუნდის მხრიდან ალასანიას გუნდის დევნას უწოდებს.
როგორც ალექსი პეტრიაშვილმა განაცხადა, საქმეები იმსხვრევა და ახლა არის მცდელობა, რომ მოხდეს საქმეების შეკერვა.
“ეს პირდაპირ უკავშირდება ღარიბაშვილის გუნდის მხრიდან ალასანიას გუნდის დევნას. სამწუხაროა, რომ ამ სქემაში ჩართულია ღარიბაშვილის გუნდის საკანონმდებლო ფრთაც პარლამენტში. ასე ვთქვათ, “ნაციონალური ოცნების” წარმომადგენლებმა და ლიდერმა მიიღო და დაიჭირა უკვე მხარე. საქმეები იმსხვრევა და ეხლა არის იმის მცდელობა, რომ მოხდეს საქმეების შეკერვა”, – განაცხადა პეტრიაშვილმა.
უმრავლესობის ლიდერმა დავით საგანელიძემ გუშინ პარლამენტის პლენარულ სხდომაზე სახელმწიფო აუდიტის სამსახურს და პროკურატურას პარლამენტში ანგარიშის წარდგენას სთხოვს.
როგორც საგანელიძემ განაცხდა, თავდაცვის სამინისტროსთან დაკავშირებით, ბოლო პერიოდში მიმდინარე მოვლენების გამო, მნიშვნელოვანია აუდიტის სამსახურმა და პროკურატურამ პარლამენტში შესაბამისი ანგარიში წარმოადგინოს.
,,მივმართავ სახელმწიფო აუდიტის სამსახურს, ის მასალები რომელიც მათ გააჩნიათ თავდაცვასთან დაკავშირებით, პარლამენტს წამოუდგინონ ანგარიშის სახით, რადგან ზოგიერთი ჯგუფი ამბობს, თითქოს თავდაცვასთან დაკავშირებით ეს არის პროკურატურის მხრიდან ცალმხრივად წარმოებული საქმე. ასევე ნდობის ჯგუფის წევრის სატუსით მივმართავ მათ, რომ ეს მასალები გამოვითხოვოთ”-განაცხადა საგანელიძემ პლენარულ სხდომაზე.
13.11.14