საქართველოში მექრთამეობის რისკის დონის დაბალი მაჩვენებლით შეფასებას შინაგან საქმეთა მინისტრის მოადგილე, ლევან იზორია უპრეცენდენტოს უწოდებს.
როგორც იზორიამ ჟურნალისტებს განუცხადა, არაკომერციულმა ბიზნესასოციაცია TRACE International–მა და ანალიტიკურმა ცენტრმა Rand Corporation-მა მსოფლიოს ქვეყნებში ბიზნესთან დაკავშირებული მექრთამეობის რისკების შემფასებელი ინდექსი trace Matrix გამოაქვეყნა. კვლევის მიხედვით, ბიზნესთან დაკავშირებული მექრთამეობის რისკის დონე საქართველოში დაბალი მაჩვენებლით შეფასდა და 197 ქვეყანას შორის 27 ქულით მე-11 ადგილი დაიკავა. შეფასება 4 მთავარი კრიტერიუმით მიმდინარეობდა: ბიზნესისა და მთავრობის ურთიერთობა, ანტიკორუფციული კანონები და მათი აღსრულება, მთავრობისა და საჯარო სამსახურის გამჭვირვალობა და ქვეყანაში სამოქალაქო საზოგადოების მიერ ზედამხედველობის განხორციელების შესაძლებლობა, მედიის როლის ჩათვლით.
“ეს არის უპრეცენდეტო შემთხვევა, რომ საქართველო არის მოწინავეთა რიგებში მათ შორის, სადაც ბიზნესგარემო არის ხელსაყრელი, სადაც კორუფცია არის დაბალ დონეზე. შესაბამისად, რისკფაქტორები, იქნება ეს ინვესტორებისთვის, ცალეკული უცხოელისთვის თუ საქართველოს მოქალაქისთვის არის ძალიან დაბალი”, – განაცხადა იზორიამ.
მინისტრის მოადგილის ინფორმაციით, აღნიშნული კვლევა წელს პირველად ჩატარდა; კვლევა 2 წელიწადში ერთხელ ჩატარდება.
კვლევის მიხედვით, პირველი ათეული ასე გამოიყურება: ირლანდია, კანადა, ახალი ზელანდია, ჰონგ კონგი, შვედეთი, ფინეთი, სინგაპური, იაპონია, გერმანია და ამერიკის შეერთებული შტატები.
რუსეთი ინდექსში 134-ე ადგილზეა, აზერბაიჯანი 140-ე, სომხეთი 87-ე, თურქეთი კი 70-ე ადგილს იკავებს.
თითოეულ ქვეყანას ენიჭება 1–დან 100 ქულამდე თითო სფეროში, ასევე კორუფციის საერთო რისკებისთვის. რაც უფრო მაღალია ქულა, მით უფრო იზრდება რისკი.
17.11.14
