ამერიკის შეერთებულ შტატებში ვიზიტის შემდეგ, გიორგი მღებრიშვილი თავის კოლეგას, ვინსკონსინის შტატის სასჯელაღსრულების დეპარტამენტის მდივანს ედ უოლს მასპინძლობს.
სასჯელაღსრულების და პრობაციის სამინისტროში გამართულ შეხვედრაზე მინისტრმა და მისმა ამერიკელმა კოლეგამ საქართველოს პენიტენციურ სისტემაში განხორციელებულ ცვლილებებზე, მიმდინარე პროექტებსა და დაგეგმილ ძირეულ რეფორმაზე ისაუბრეს.
ვიზიტის ფარგლებში ედ უოლი თავისუფლების შეზღუდვისა და დაბალი რისკის დაწესებულებებს მოინახულებს, ასევე ადგილზე გაეცნობა სასჯელაღსრულების დაწესებულებების ადმინისტრირების საკითხს.
საქართველოს სასჯელაღსრულების სამინისტრო ვისკონსინის შტატის სასჯელაღსრულების სისტემასთან 2014 წლიდან მჭიდროდ თანამშრომლობს. ვისკონსინის შტატის დელეგაცია გამოცდილების გაზიარებისა და მიმდინარე რეფორმების განხორციელების პროცესში დახმარების მიზნით, საქართველოს მიმდინარე წლის სექტემბერში ეწვია.
ამერიკელი კოლეგები ქართულ მხარეს კონსულტაციებს უწევენ დაწესებულებათა ადმინისტრირების ასპექტებთან დაკავშირებით, მათ შორისაა სასჯელის ინდივიდუალური დაგეგმვა, მსჯავრდებულთა რეაბილიტაცია, მულტიდისციპლინური ჯგუფის მენეჯმენტი, დაწესებულებათა მართვის საკითები და კომუნიკაცია.
ვისკონსინელი კოლეგები სასჯელაღსრულების სისტემის მენეჯერებს დახმარებას ამერიკის შეერთებული შტატების საელჩოსა და სასჯელაღსრულებისა და პრობაციის სამინისტროს შორის გაფორმებული მემორანდუმის ფარგლებში უწევენ. აღნიშნული მემორანდუმით აშშ-ის საერთაშორისო ნარკოტიკებისა და კანონის აღსრულების საქმეთა ბიურო (INL) საქართველოს სასჯელაღსრულების სისტემაში 2-წლიან პროექტს განახორციელებს. ამერიკის მთავრობამ მიმდინარე წლის სექტემბერში აღნიშნული პროექტის განხორციელების მიზნით 1 მილიონი დოლარი გამოყო.
პროექტის ძირითადი მიზნებია საქართველოში თანამედროვე და ჰუმანური სასჯელაღსრულების პრაქტიკის დანერგვა, მულტიდისციპლინარული გუნდის დანერგვის ხელშეწყობა, ასევე სამინისტროსა და სასჯელაღსრულების დეპარტამენტის თანამშრომელთა შესაბამისი მომზადება.
სასჯელაღსრულებისა და პრობაციის მინისტრის, გიორგი მღებრიშვილის განცხადებით, ედ უოლის ვიზიტი კიდევ ერთი მაგალითია ვისკონსინის შტატისა და ჩვენი პენიტენციური სისტემების მჭიდრო თანამშრომლობისა.
„მოგეხსენებათ, რომ საქართველოსა და ამერიკის შეერთებულ შტატებს შორის წელს დაიდო მემორანდუმი, რომლის ფარგლებში საქართველოს სასჯელაღსრულების სისტემაში ორწლიანი პროგრამა ხორციელდება. ეს არის პირველი პროექტი, რომლის ფარგლებში ამერიკის შეერთებული შტატები კონკრეტულად სასჯელაღსრულების სისტემის განვითარებაში გვეხმარება. კერძოდ, აღნიშნული ითვალისწინებს თანამშრომლეთა კვალიფიკაციის ამაღლების მიმართულებით მხარდაჭერას, რაც ჩემ მიერ ინიცირებული პენიტენციური რეფორმის ერთერთი მთავარი კომპონენტია“ – აღნიშნა გიორგი მღებრიშვილმა.
ედ უოლის განცხადებით, საქართველოს სასჯელაღსრულებისა და პრობაციის სამინისტროსთან მჭიდრო თანამშრომლობის ფარგლებში განხორციელებული გაცვლითი ვიზიტები ძალიან მნიშვნელოვანია, რათა ამერიკულმა მზარემ ქართველ კოლეგებს გამოცდილება გაუზიაროს და მართვის ეფქტური სისტემის დანერგვაში დაეხმაროს.
03.12.14
