თბილისში დაახლოებით 11 ათასამდე ოჯახს დასუფთავების დავალიანება გაუნულდება, – ამის შესახებ დედაქალაქის საკრებულოს ქონების მართვისა და საფინანსო-საბიუჯეტო კომისიის თავმჯდომარემ ჯაბა სამუშიამ დღეს გამართულ ბრიფინგზე, 2014 წლის ბიუჯეტში შესატან ცვლილებებზე საუბრისას განაცხადა.
მისი თქმით, თბილისის საკრებულოსა და მერიის ერთობლივი გადაწყვეტილებით, წელს ცხადდება ამნისტია და დასუფთავების გადასახადის დავალიანების მქონე ოჯახებს მისი დასაფარი თანხა ვაუჩერის სახით დაერიცხებათ, რაც ბიუჯეტში 1 მლნ. ლარს შეადგენს.
ჯაბა სამუშიამ 2014 წლის ბიუჯეტში განსახორციელებელ ცვლილებებზე დეტალურად ისაუბრა და განაცხადა, რომ დედაქალაქის მთავრობა კომერციული ბანკიდან სესხს აღარ აიღებს.
მისი თქმით, წინა ხელისუფლების მიერ ბიუჯეტის ფორმირებისას დაშვებული შეცდომებით გამოწვეული დეფიციტის შესავსებად საკრებულომ სექტემბრის თვეში თბილისის მთავრობას კომერციული ბანკებიდან 30 მილიონი ლარის სესხის საკრედიტო ხაზის გახსნის უფლება მისცა.
“აღნიშნული თანხის გამოყენება მერიას აღარ დასჭირდა, რამაც ბიუჯეტის 30 მილიონი ლარით შემცირება გამოიწვია. აქედან გამომდეინარე, წლევანდელ ბიუჯეტს 742 მილიონი ლარით დავასრულებთ“,- განაცხადა ჯაბა სამუშიამ.
დედაქალაქის საკრებულოს ქონების მართვისა და საფინანსო-საბიუჯეტო კომისიის თავმჯდომარის ინფორმაციით, მერიის სტრუქტურებში დასაქმებულ 17 ათას ადამიანს საახალწლოდ მე-13 ხელფასი დაერიცხება.
ჯაბა სამუშიას თქმით, აღნიშნულ თანხას თბილისის სატრანსპორტო კომპანიაში დასაქმებული მძღოლები, საბავშვო ბაღების აღმზრდელები და “თბილსერვისჯგუფის” თანამშრომლები მიიღებენ.
მისივე განცხადებით, გუშინ საკრებულოს უმრავლესობამ შეხვედრა გამართა თბილისის მერიის საფინანსო გუნდთან, სადაც შემუშავდა წინადადება, დაიწყოს თანხების მოძიება, რათა თბილისის თვითმმართველობასა და მერიის დაქვემდებარებაში მყოფი მუზეუმების, ასევე შპს “სინათლის ქალაქში” დასაქმებულმა ადამიანებმა წინასაახალწლოდ გარკვეული ფინანსური შეღავათები მიიღონ.
აღნიშნულ ინიციატივას საკრებულოს დეპუტატები დღეს დაგეგმილ ბიუროზე და შემდგომ საკრებულოს სხდომაზე განიხილავენ.
12.12.14
