13 დეკემბერს გამთენიას საყდრისში აფეთქება მოხდა. განადგურებულია ქრისტეს შობამდე 4-3 ათასწლეულის მსოფლიოში უნიკალური უძველესი ოქროს მაღარო, სადაც ოქრო სამთო წესით მოიპოვებოდა. საყდრისის მსოფლიო მნიშვნელობას და უნიკალურობას მთელი მსოფლიოს სამეცნიერო კორპუსი აღაირებდა. არაერთი წერილი მიიღო ოფიციალურმა ქართულმა მხარემ, მოფრთხილებოდა მსოფლიო მნიშვნელობის კულტურულ მემკვიდრეობას.
საქართველოს ეკლესია გმობს ამ აქტს და იმ ადამიანებს, ვინც ეს ჩაიდინა, – ამის შესახებ სამების საკათედრო ტაძარში საკვირაო ქადაგებისას სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ ბრძანა. პატრიარქი მოუწოდებს საქართველოს ხელისუფლებას, რომ ამ აქტის ჩამდენმა სათანადო სასჯელი მიიღოს.
“საყდრისთან დაკავშირებით არსებობს პრობლემა, თუ რამდენად მნიშვნელოვანია საყდრისი. ამას ამბობენ მეცნიერები, რომ ეს არის უძველესი ოქროს საბადო საქართველოში. ამ დღეებში მოხდა აფეთქება და საქართველოს ეკლესია გმობს ამ აქტს. ჩვენ ვგმობთ ამ აქტს და იმ ადამიანებს, რომლებმაც ეს აფეთქება მოაწყო. ჩვენ ვთხოვთ ხელისუფლებას, რომ გამოძიებული იყოს, რათა დადგინდეს აქტის ჩამდენი და სათანადო სასჯელი მიიღოს” – ბრძანა პატრიარქმა.
The Tbilisi Times ფლობს ინფორმაციას, რომ საზოგადოებაში უკვე მუსირებს აზრი საყდრისის მიზანმიმართულ განადგურებაზე. ძირითადად ორი ვერსია განიხილება, – ეს არის ქართული ფესვების, თვითმყოფადობის საწყიდების განადგურება და მეორე საზოგადოების პანიკაში ჩაგდება და პოლიტიკური ავანტურა. თუმცა, ორივეს დაშვებულობაზეც არის საუბარი. აღნიშნულ ვერსიაზე საუბრობენ ასევე დარგის სპეციალისტები და საყდრისის საკითხებში გარკვეული დაინტერესებული პირები.
