დედაქალაქის მუნიციპალიტეტის საკრებულოში პუშკინის ქუჩაზე ორმხრივ მოძრაობასთან დაკავშირებული 11 პროექტის განხილვა გაიმართა, რომელსაც საკრებულოს თავმჯდომარე, თბილისის მერი, საკრებულოს საქალაქო მეურნეობისა და ურბანული დაგეგმარების კომისიის წევრები და პროექტების ავტორები დაესწრნენ.
წარმოდგენილ პროექტთაგან საუკეთესო უკვე თვის ბოლოსთვის შეირჩევა.
როგორც საკრებულოს თავმჯდომარემ, გიორგი ალიბეგაშვილმა განაცხადა, არქიტექტორებმა დღეს საკმაოდ საინტერესო და მრავალფეროვანი პროექტები წარმოადგინეს, რომელთა განხილვა მომავალშიც გაგრძელდება. საკრებულოს თავმჯდომარე არ გამორიცხავს, რომ მოხდეს გარკვეული პროექტების შეჯერებაც.
,, საბოლოოდ უნდა გამოვლინდეს ისეთი პროექტი, რომლის განხორციელების შედეგადაც თბილისი შეინარჩუნებს ისტორიულ იერსახეს და ამავდროულად განტვირთავს მოძრაობას. ასევე აუცილებელია იმის გათვალისწინებაც თუ როგორ იმოძრავებენ ფეხით მოსიარულეები“, – განაცხადა საკრებულოს თავმჯდომარემ.
როგორც თბილისის მერმა დავით ნარმანიამ აღნიშნა, თბილისის მერიამ პირობა შეასრულა და საუკეთესო პროექტის გამოვლენის მიზნით საჯარო განხილვა მოაწყო.
,, განხილვები გაგრძელდება და საბოლოოდ საუკეთესო საინჟინრო გადაწყვეტილების მქონე პროექტი გამოვლინდება. დარწმუნებული ვარ, რომ გამარჯვებული პროექტი ეფექტურად განხორციელდება და პუშკინის ქუჩის განტვირთვა მოხდება“,- განაცხადა დავით ნარმანიამ.
18.12.14