მთავრობის სხდომაზე პრემიერი ღარიბაშვილი გამოეხმაურა პოლიციელებთან დაკავშირებულ ვიდეომასალის გავრცელებას, პრემიერი მომხდარს აფასებს, როგორც ”ნაციონალური მოძრაობის” მიზანმიმართულ და ანტისახელმწიფოებრივ კამპანიას, რომელიც სამართალდამცველების დისკრედიტაციას ისახავს მიზნად.
„პოლიციელზე ნებისმიერი უსამართლოდ ნათქვამი სიტყვა, თუ ქმედება, არის ანტისახელმწიფოებრივი საქციელი. ჩვენი სამართალდამცავი სისტემის შრომა არის ფასდაუდებელი და მათ სჭირდებათ დაცვა და გვერდით დგომა მთავრობის, საზოგადოების მხრიდან. ეს ადამიანები 24 საათის განმავლობაში ებრძვიან კრიმინალს, მიდიან ტყვიაზე ჩვენი ხალხისა და ქვეყნის გამო”, – განაცხადა პრემიერმა.
ირაკლი ღარიბაშვილმა აღნიშნა, რომ პოლიციელების დისკრედიტირების საშუალებას არავის მისცემს, ხოლო ნაციონალურ მოძრაობას ეს სახიფათო თამაში ძალიან ძვირად დაუჯდება.
ირაკლი ღარიბაშვილის თქმით, მომხდარი არის ყოვლად დაუშვებელი და ამაზრზენი ფაქტი. პრემიერი მიიჩნევს, რომ მისი ხელისუფლების პირობებში პოლიცია გახდა თავისუფალი, ჩადგა ხელისუფლების სამსახურში და დაუბრუნდა ღირსება. მან ასევე ახსენა ახალაიების, მერაბიშვილისა და კოდუას გვარები და აღნიშნა, რომ მათ ხელში უწყება იყო დაქსაქსული და დემორალიზებული.
ნინა პირტახია
