2012 წლის 25 ოქტომბერს პარლამენტის მიერ დამტკიცებულ სამთავრობო პროგრამაშია ჩადებული ის მოდელი, რომლის მიხედვითაც მთავარი პროკურორი პრეზიდენტის წარდგინებით საკანონმდებლო ორგანომ უნდა დაამტკიცოს, – ამის შესახებ ჟურნალისტებს ადამიანის უფლებათა საკითხებში პრეზიდენტის მრჩეველმა კახა კოჟორიძემ განუცხადა.
შეკითხვაზე, რამდენად უჭერს მხარს აღნიშნულ მოდელს, კოჟორიძემ, როგორც პრეზიდენტის ადმინისტრაციის წარმომადგენლებმა პასუხისგან თავი შეიკავა.
“ეს იყო მოდელი, რომელიც 2012 წლის 25 ოქტომბერს ახლად არჩეული პარლამენტის მიერ დამტკიცებულ სამთავრობო პროგრამაშია ჩადებული, მაგრამ მე, დღეს, როგორც პრეზიდენტის ადმინისტრაციის წარმომადგენელი კონკრეტულ მოდელებზე ვერ ვისაუბრებ. კონკრეტული მოდელების განხილვა-გადაწყვეტის საკითხი არ არის პრეზიდენტის პირდაპირი უფლებამოსილება. მე შემიძლია იმის თქმა, რომ უაღრესად სასურველია დროულად გატარდეს პროკურატურის რეფორმა და გადაიდგას ისეთი ნაბიჯები, რომლის შემდეგაც პროკურატურის საქმიანობასთან დაკავშირებით საზოგადოების არც ერთ წევრს არ დარჩება აღქმა, რომ რაიმე არასწორი ხდება”, – აღნიშნა კოჟორიძემ.
არასამთავრობო სექტორის ერთი ნაწილის მოსაზრებით, მთავარი პროკურორი პრეზიდენტის წარდგინებით პარლამენტმა უნდა დაამტკიცოს. ასეთია კოალიცია “დამოუკიდებელი და გამჭვირვალე მართლმსაჯულებისთვის” პოზიცია, რომელმაც საკუთარი ხედვა ხელისუფლების წარმომადგენლებს დღეს წარუდგინა.
