განათლების მინისტრმა თამარ სანიკიძემ მასწავლებელთა პროფესიული განვითარების ახალი სქემის პრეზენტაცია გამართა. როგორც თამარ სანიკიძემ აღნიშნა, მასწავლებლის საქმიანობის დაწყების, პროფესიული განვითარებისა და კარიერული წინსვლის სქემა, რომლის მარეგულირებელი დოკუმენტი სპეციალურმა სახელმწიფო კომისიამ შეიმუშავა, დღეს საქართველოს მთავრობამ დაამტკიცა. მისივე თქმით, სქემა ერთიანი სისტემაა, რომლის ფარგლებშიც უზრუნველყოფილია პედაგოგის მომზადება პროფესიისთვის. დოკუმენტში ასახულია, როგორ უნდა იყოს საუნივერსიტეტო პროგრამა, პროფესიაში შესვლის გზები და როგორ უნდა მოხდეს ხელშეწყობა პედაგოგებისთვის, რათა მოხდეს მათი კარიერული წინსვლა. “აქამდე მოქმედი სერთიფიცირების მოდელის ძირითადი ხარვეზი ის იყო, რომ მოდელი იყო არასისტემური და მასწავლებლის შეფასება ხდებოდა მხოლოდ საგამოცდო ფორმატში, არ იყო ორიენტირებული მასწავლებლის განვითარებაზე და სრულად ვერ ასახავდა მასწავლებლის საქმიანობას და მის პრაქტიკულ უნარ-ჩვევებს”, – განაცხადა თამარ სანიკიძემ. მინისტრის განმარტებით, მასწავლებლის შეფასების ახალი სისტემის დანერგვით ცნობილი გახდება, რამდენად ეფექტურად იყენებს პედაგოგი მის ცოდნას და უნარ-ჩვევებს პრაქტიკაში და რა უნდა გაკეთდეს იმისათვის, რომ მოსწავლის შედეგები გაუმჯობესდეს. “სქემის ფარგლებში მოხდება მნიშვნელოვანი ფუნქციების სკოლაზე დელეგირება და ამით მისი ავტონომიურობის გაზრდა. შეფასების კომპონენტი არის ყველა შემდგომი ქმედების დასაგეგმად აუცილებელი წინაპირობა, რომლის სკოლაში არსებობა ნიშნავდა, რომ სკოლა არ იყო ორიენტირებული სწავლის და შედეგების გაუმჯობესებაზე”, – განაცხადა თამარ სანიკიძემ. მისივე თქმით, რაც შეეხება გარე შეფასებებს, აქ იქნება შეფასების ორი ფორმა: საგნობრივი გამოცდა და პრაქტიკაში დაკვირვება. “რადგან ეს არის რეგულირებადი პროფესია, სხვა რეგულირებადი პროფესიების მსგავსად ამ შემთხვევაშიც სახელმწიფო აყენებს მინიმალურ მოთხოვნებს, ხოლო ძირითადი ფუნქცია და აქტივობები ხორციელდება სკოლაში”, – აცხადებს მინისტრმა. თამარ სანიკიძის ინფორმაციით, პროფესიულ განვითარებასთან ერთად იქნება ფინანსური მხარდაჭერაც. მისივე თქმით, კარიერული წინსვლა დამოკიდებული იქნება ფინანსურ მოტივაციაზე. “უკეთესი ფინანსური მდგომარეობის უზრუნველსაყოფად კარიერულ საფეხურებში მოძრაობა დაგეგმილია მაქსიმალურად მოქნილად”, – განაცხადა მინისტრმა. თამარ სანიკიძის განმარტებით, სქემაზე დაყრდნობით მომზადდა ახალი უმაღლესი საგანმანათლებლო პროგრამები, რომელიც კვალიფიციურ პედაგოგებს მოამზადებს. “დღემდე მასწავლებლის მომზადებისა და შეფასების თანმიმდევრული, ერთიანი სისტემა არ არსებობდა. ახალი სისტემა კი ხელს შეუწყობს ახალგაზრდების პედაგოგიური სფეროთი დაინტერესებას და მოემსახურება მასწავლებლის პრესტიჟის ამაღლებას. სამინისტრო ითვალისწინებს სქემის მასშტაბურობას და 2015-1016 წლებში სქემა იმუშავებს საპილოტე რეჟიმში, თუცმა პედაგოგების მიერ პილოტირების პროცესში მიღწეული წარმატება შენარჩუნდება და გავლენას იქონიებს მისი საფეხურებში მოძრაობის პროცესზე”, – განაცხადა თამარ სანიკიძემ. მისივე განმარტებით, ახალი სქემის ამოქმედების საფუძველზე მოსწავლის სასწავლო შედეგები გაუმჯობესდება და ქვეყანა მიიღებს გაძლიერებულ და გადამზადებულ პედაგოგთა კორპუსს და მოხდება სისტემაში კვალიფიციური კადრების შედინება.
