საჯარო უწყებებში ადამიანური რესურსების მართვის ელექტრონული პროგრამის დანერგვის ფარგლებში, სასჯელაღსრულებისა და პრობაციის სამინისტროში საინფორმაციო-სასწავლო ხასიათის შეხვედრა გაიმართა, რომელსაც სამინისტროს საინფორმაციო ტექნოლოგიებისა და ადმინისტრაციული დეპარტამენტის თანამშრომლები, პრობაციის ეროვნული სააგენტოსა და სასჯელაღსრულებისა და პრობაციის სასწავლო ცენტრის წარმომადგენლები დაესწრნენ.
სამინისტროს ინფორმაციით, შეხვედრაზე განიხილეს ადამიანური რესურსების მართვის ახალ სტანდარტებზე გადასვლის მნიშვნელობა სასჯელაღსრულების სისტემის გამართულად და ეფექტურად მუშაობისა და განვითარებისთვის.
აღნიშნული ელექტრონული პროგრამის დანერგვა ხელს შეუწყობს ადამიანურ რესურსებთან დაკავშირებული მონაცემების, ინფორმაციის, სერვისის, მონაცემთა ბაზების, მეთოდების განვითარებას და შესაბამისად, გააძლიერებს ადმინისტრაციული მართვის ეფექტურობას, გააუმჯობესებს მომსახურების, პერსონალური მონაცემების დაცვის სტანდარტებსა და თანამშრომელთა მუშაობის მონიტორინგის სისტემას.