1-დან 7 მარტის ჩათვლით, საქართველოს პარლამენტის თავმჯდომარე დავით უსუფაშვილი ოფიციალური ვიზიტით ამერიკის შეერთებულ შტატებს ეწვევა, – ამის შესახებ გუშინ გამართულ პრესკონფერენციაზე საგარეო საქმეთა სამინისტროს სპიკერმა დავით კერესელიძემ განაცხადა. მისივე თქმით, ვიზიტის ფარგლებში, საქართველოს პარლამენტის თავმჯდომარე შეხვედრებს გამართავს ამერიკის შეერთებული შტატების საკანონმდებლო და აღმასრულებელი ხელისუფლების წარმომადგენლებთან, ასევე ამერიკის წამყვან კვლევით ცენტრებთან და მედიის წარმომადგენლებთან. კერესელიძის თქმით, შეხვედრების მთავარი თემა იქნება საქართველოს უსაფრთხოების გარემო, ჩვენი ქვეყნის წინაშე არსებული გამოწვევები, დემოკრატიული განვითარება, საქართველო-ამერიკის შეერთებული შტატების სტრატეგიული პარტნიორობის მიმართულებები და თანამშრომლობის გაღრმავების საკითხები. “როგორც მოგეხსენებათ, საქართველო ამერიკის შეერთებული შტატების კონგრესის ორივე პალატაში ორპარტიული მხარდაჭერით სარგებლობს და აღნიშნული ვიზიტი ამ მხარდაჭერის კიდევ უფრო გამყარებას ემსახურება”, – განაცხადა კერესელიძემ.
