სურსათის ეროვნულმა სააგენტომ მომხმარებელთა ინტერესებისა და ქართული ბაზრის ფალსიფიკაციისაგან დასაცავად ღვინისა და ალკოჰოლიანი სასმელების ფართომასშტაბიანი შემოწმება დაიწყო.
მიმდინარე წლის თებერვალში თბილისსა და საქართველოს რეგიონებში გამოკვლეულია სხვადასხვა წარმოების ჩამოსასხმელი ღვინის 20 ნიმუში, 14 ნიმუშის კვლევის შედეგები კი რამდენიმე დღეში გახდება ცნობილი.
სააგენტოს ცნობით, რესტორნებში, მარკეტებსა და საცალო ვაჭრობის ობიექტებში აღებული ნიმუშები აკრედიტებულ ლაბორატორიაში (შპს “ღვინის ლაბორატორია”) შემოწმდა. ლაბორატორიული კვლევის შედეგად 6 ნიმუშში გამოვლინდა სხვადასხვა მაჩვენებლის დარღვევა, კერძოდ, უშაქრო ექსტრაქტის, ვაშლის, ღვინისა და რძემჟავების ნაკლებობა; აქროლადი მჟავების სიჭარბე; მალვიდინის დიგლუკოზიდის მომატებული რაოდენობა. როგორც სურსათის ეროვნული სააგენტო განმარტავს, აღნიშნული დარღვევები ღვინის რეალიზაციის აკრძალვას და პროდუქციის ბაზრიდან გამოთხოვას ითვალისწინებს, რაზეც ზედამხედველობას სააგენტოს უფლებამოსილი პირები განახორციელებენ.
მარტში დაგეგმილია ჩამოსასხმელი ღვინის 60-მდე ნიმუშის აღება. პარალელურად, ჩატარდება ინსპექტირებები ღვინის საწარმოებში, სადაც სურსათის ეროვნული სააგენტოს ინსპექტორები შეისწავლიან საწარმოს სანიტარიულ-ჰიგიენურ მდგომარეობას და მის შესაბამისობას კანონმდებლობით დადგენილ ნორმებთან.
“სურსათის ეროვნული სააგენტოს მიერ დაგეგმილი ღონისძიებები მაქსიმალურად შეამცირებს ბაზარზე ფალსიფიცირებული ღვინის გავრცელების რისკს, გაზრდის პროდუქციის ხარისხს და მომხმარებელს დაიცავს საეჭვო წარმომავლობის მავნებელი სასმელისაგან, ექსპორტის შემთხვევაში კი, ქართულ ღვინოს ღირსეულად წარმოაჩენს მსოფლიო ბაზარზე”, – აღნიშნული უწყების მიერ გავრცელებულ ინფორმაციაში.
Discussion about this post