ისრაელის პრეზიდენტმა, რეუვენ რივლინმა ქართველი კოლეგა გიორგი მარგველაშვილი ისრაელში მიიწვია.
პრეზიდენტის ადმინისტრაციის ინფორმაციით, ისრაელის ელჩმა საქართველოში, უივალ ფუქსმა გიორგი მარგველაშვილს რივლინის მიწვევა დღეს გადასცა. საქართველოს პრეზიდენტის განცხადებით, იგი აუცილებლად ეწვევა ისრაელს, როგორც კი ამის შესაძლებლობა მიეცემა.
შეხვედრაზე მხარეებმა საქართველოსა და ისრაელს შორის ურთიერთობა და თანამშრომლობის გაღრმავების პერსპექტივები განიხილეს. საუბარი შეეხო საქართველოს ოკუპირებულ რეგიონებში შექმნილ ვითარებას, ასევე გლობალური და რეგიონალური უსაფრთხოების საკითხებს, კერძოდ ახლო აღმოსავლეთსა და უკრაინაში მიმდინარე მოვლენებს.
