“მათი მთავარი ამოცანაა საკითხის განხილვა რიგგარეშე, საგაგნგაშო რეჟიმში და ამ პროცესში საგანგებოდ პრეზიდენტის ჩართვა”-დავით უსუფაშვილი

„საპარლამენტო უმცირესობის მოქმედებებიდან ირკვევა, რომ მათი მთავარი ამოცანაა არა საკითხის განხილვა და ლარის კურსის გამყარებაზე ზრუნვა, არამედ საკითხის განხილვა რიგგარეშე, საგაგნგაშო რეჟიმში, ამ პროცესში საგანგებოდ პრეზიდენტის ჩართვა და ამაზე დებატებით რაც შეიძლება დიდი ხნის განმავლობაში მედიასივრცის გაჯერება“-ეს განცხადება საქართველოს პარლამენტის თავმჯდომარემ რამდენიმე წუთის წინ საგანგებო ბრიფინგზე გააკეთა. მან აღნიშნა, რომ პარლამენტის რიგგარეშე სხდომა მნიშვნელოვანი პოლიტიკურ-სამართლებრივი ინსტიტუტია და მისი სწორად გამოყენება და გააზრება აუცილებელია. როგორც უსუფაშვილმა განმარტა რიგგარეშე სხდომის საკითხის ირგვლივ მოქმედება ემყარება უმცირესობის სურვილს ქვეყანაში იყოს საგანგაშო მდგომარეობა, ამაში ჩაერთოს პრეზიდენტი და დიდხანს მიმდინარეობდეს ამაზე საუბარი. უსუფაშვილის თქმით პარლამენტი სასესიო რეჟიმში მუშაობდა 16-21 თებერვალს, ასევე 2-7 მარტს, თუმცა პარლამენტის თავმჯდომარის თქმით ნაციონალურ მოძრაობას არცერთხელ არ დაუყენებია ლარის კურსის დასტაბილურების საკითხი სესიაზე. უსუფაშვილმა აქვე განმარტა, რომ კანონის თანახმად პარლამენტი სრულად უზრუნველყოფს რიგგარეშე სესიის ჩატარებას. მან აქვე განმარტა, რომ კანონით დეპუტატებს აქვთ უფლება არ დაესწრონ სხდომას. შეგახსენებთ, რომ საქართველოს პრეზიდენტმა გიორგი მარგველაშვილმა პარლამენტის რიგგარეშე სხდომა 13 მარტისთვის დანიშნა. ამ თხოვნით მას საპარლამენტო ოპოზიციამ მიმართა. მმართველი უმრავლესობის წარმომადგენლები აცხადებენ, ისინი რიგგარეშე სხდომაში მონაწილეობას არ მიიღებენ.