საქართველოს კულტურისა და ძეგლთა დაცვის სამინისტროს მხარდაჭერით, “საქართველოს ფოლკლორის ეროვნული ფესტივალი” მაისის ბოლოს დაიწყება. ფესტივალის საზეიმო გახსნა დაგეგმილია კახეთში.
აღნიშნულთან დაკავშირებით ხვალ, კულტურის მინისტრი მიხეილ გიორგაძე, საქართველოს ფოლკლორის სახელმწიფო ცენტრის აღმასრულებელი დირექტორი გიორგი დონაძე და საქართველოს ფოლკლორის სახელმწიფო ცენტრის სამეურვეო საბჭოს თავმჯდომარე ანზორ ერქომაიშვილი “საქართველოს ფოლკლორის ეროვნული ფესტივალის” ჩატარებასთან დაკავშირებით იმსჯელებენ.
კულტურის სამინისტროს ინფორმაციით, ფესტივალი მოიცავს ქართული ტრადიციული ხელოვნების შემდეგ დარგებს: ხალხური სიმღერა, ტრადიციული საეკლესიო გალობა, ტრადიციული ინსტრუმენტული შემსრულებლობა, ქორეოგრაფია, ზეპირსიტყვიერი ფოლკლორი, სახვითი და გამოყენებითი ხელოვნება.
ფოლკლორის ფესტივალი შედგება რეგიონული (2015 წელი) და დასკვნითი ტურებისაგან (2016 წელი). ლაურეატების დაჯილდოება გაიმართება ქალაქ თბილისში 2016 წელს. ფესტივალის გამარჯვებულებს გამოავლენს საგანგებოდ შექმნილი დარგობრივი კომისია. ფინალისტებს გადაეცემათ I, II და III ხარისხის ფულადი პრემია. ცალკე ნომინაცია დაწესდება მუსიკასა და ქორეოგრაფიაში – უძველესი ნიმუშების აღდგენა-დამუშავება და შესრულება (ქართული ხალხური სიმღერა, ცეკვა, საკლესიო გალობა), სახვითი და გამოყენებითი ხელოვნების დარგში – საკრავებისა და ეროვნული სამოსის აღდგენა და შექმნა.
ფესტივალის დებულების თანახმად, ფოლკლორის ეროვნულ ფესტივალში მონაწილეობის საშუალება ექნება საქართველოში მცხოვრებ ყველა ეთნიკური უმცირესობის ფოლკლორულ ჯგუფს, ინდივიდუალურ შემსრულებელს, სახვითი და გამოყენებითი ხელოვნების დარგის წარმომადგენელს. ფესტივალის ყველა გამარჯვებულს, ფულად პრემიებთან და სახელობით პრიზებთან ერთად გადაეცემა ლაურეატის დიპლომი.
საქართველოს ფოლკლორის ეროვნული ფესტივალის შესახებ 2016 წლისთვის გამოიცემა წიგნი, ხოლო ფესტივალის ლაურეატთა დაჯილდოების საზეიმო ცერემონიის ამსახველი ვიდეო მასალა DVD დისკის სახით.
