ჯანდაცვის მინისტრმა დავით სერგეენკომ მთავრობის სხდომის დაწყებამდე ”თბილისი თაიმსს” განუცხადა, რომ მისი ინფორმაციით, მედიკამენტებზე ფასების კლების ტენდენცია შეინიშნება. მისი თქმით, იმ რთული ეკონომიკურ პირობებში, რომელიც არა მარტო საქართველოში, არამედ მთელს რეგიონშია, მოხერხდა მედიკამენტებზე ფასების ზრდის ტენდენციის შემცირება და გაიაფება.
”ვგულისხმობ იმას, რომ თუ იყო გამოკვეთილი 15-20%-იანი ზრდა რამდენიმე ასეულ მედიკამენტზე, ახლა ამ ტენდენციამ იკლო. მინდა ხაზი გაუსვა ფარმაცევტულ კომპანია 
”პე ეს პეს” მიერ საზოგადოების ინტერესებისკენ გადადგმულ ნაბიჯებს, კომპანიამ ამ ნაბიჯით რამდენიმე ათეულ პირველადი მოხმარების მედიკამენტზე ფასი შეამცირა, ამით ჩვენ გარკვეულ სტაბილურობას მივაღწიეთ,”- განაცხადა დავით სერგეენკომ.
ჟურნალისტებთან საუბარში დავით სერგეენკო ასევე შეეხო ქვეყნის სტაბილიზაციის გეგმას. მისი თქმით ქვეყნის კრიზისიდან გამოყვანის გეგმაზე მუშაობა თითქმის დასრულებულია, რომლის წარდგენისათვის მაქსიმალურად ეფექტური გზა იქნება შერჩეული.
“პირველი რიგში მნიშვნელობა აქვს, რომ საზოგადოება ეკონომიკიური ბლოკის მიერ ინფორმირებული იყოს მიმდინარე საკითხებსა და სამოქმედო გეგმაზე, რაც პრაქტიკულად, ჩამოყალიბებულია. რაც შეეხება იმას, რა ფორმით მოხდება წარდგენა – საკომიტეტო თუ რიგგარეშე სხდომაზე, ეს ჩემი მხრიდან რთული შესაფასებელია. არჩეული იქნება ის გზა, რომელიც მაქსიმალურად ეფექტური იქნება ამ გზავნილების მისაწოდებლად,”- განმარტა დავით სერგეენკომ.
მასალა მოამზადა
ნინა პირტახიამ
