საქართველოს ტურიზმის ეროვნულ ადმინისტრაციაში, ახალგაზრდა ფინანსისტთა და ბიზნესმენთა ასოციაცია – „აფბამ“ და საქართველოს ტურიზმის ეროვნულმა ადმინისტრაციამ ურთიერთთანამშრომლობის შესახებ მემორანდუმს მოაწერეს ხელი.
“აფბას” ინფორმაციით, მემორანდუმის მიზანია, ადმინისტრაციასა და „აფბა“–ს შორის თანამშომლობით, ხელი შეუწყოს დაინტერესებული პირებისათვის, ასევე სამიზნე აუდიტორიისთვის ტურიზმის სფეროში მიმდინარე რეფორმების, სისტემური სიახლეების აქტუალიზაციას და პრობლემური საკითხების გადაწყვეტას საზოგადოების ფართო ფენების ჩართულობით.
ადმინისტრაცია მემორანდუმის საფუძველზე, მიაწვდის „აფბა“-ს ინფორმაციას იმ საკითხების შესახებ, რაც საქართველოს მასშტაბით ტურიზმის განვითარებას და ტურიზმში მიმდინარე პროცესებს ეხება, ამასთან „აფბა“ უზრუნველყოფს, ადმინისტრაციასთან თანამშრომლობით და ასევე დამოუკიდებლად, აქტუალური საკითხების პოპულარიზაციას, ეს შეიძლება მოხდეს კონფერენციების ჩატარებით, სადაც მოწვეულნი იქნებიან შესაბამისი დარგის სპეციალისტები.
მემორანდუმს ხელი „აფბას“ მხრიდან „აფბას“ ვიცე–პრეზიდენტმა შოთა გულბანმა მოაწერა, ხოლო ადმინისტრაციის მხრიდან ადმინისტრაციის ხელმძღვანელმა გიორგი ჩოგოვაძემ.
შოთა გულბანის განცხადებით, აუცილებელია უფრო მჭიდრო თანამშრომლობა არასამთავრობო სექტორსა და საკანონმდბლო და აღმასრულებელ ხელისუფლებასთან, ამ მხრივ ტურიზმის ეროვნული ადმინისტრაცია ის ორგანოა, რომელიც მის მიერ განხორციელებული პოლიტიკით, ზრუნავს ქვეყანაში ტურისტების მოზიდვაზე, რაც თავის მხრივ ერთ–ერთი მნიშვნელოვანი კომპონენტია ქვეყანაში უცხოური ვალუტის შემოდინების. სწორედ ამიტომ, არა მარტო სახელმწიფო სტრუქტურები, არამედ არასამთავრობო სექტორიც საზოგადოების სხვა წევრებიც აქტიურად უნდა იყვნენ ჩართული ტურიზმის სფეროს აქტუალიზაციით.
თავის მხრივ ადმინისტრაციის ხელმძღვანელმა გიორგი ჩოგოვაძემაც გამოთქვა სურვილი, რომ აქტიურად ითანამშროლოს საზოგადოების ფართო ფენებთან, მათ შორის არასამთავრობო სექტორთან, რომ ადმინისტრაციაში და ზოგადად ტურიზმში მიმდინარე პროცესები საჯარო და გასაგები იყოს მოსახლეობისთვის.
