რეიტინგები არის უსაქმურების საქმე, – ასე გამოეხმაურა საქართველოს პრემიერ-მინისტრი ირაკლი ღარიბაშვილი IRI-ს კვლევებზე დასმულ შეკითხვას. მისი თქმით, მთავრობა იქნება, პრეზიდენტი, პარლამენტის თავმჯდომარე თუ მინისტრები, რომლებიც ოცნებობენ რეიტინგზე, ისინი გულწრფელები თავის საქმეში არ არიან.
“ჩემთვის საზრუნავი არის ლარი, სამუშაო ადგილები და არა რეიტინგები. რეიტინგები არის უსაქმურების საქმე. მე მოვუწოდებ უსაქმურებს, რომ დაკავდნენ ამ რეიტინგების შესწავლით. მე რეიტინგებზე არასდროს გამიკეთებია აქცენტი და არასდროს მიმიქცევია ყურადღება. მთავრობა იქნება, პარლამენტის თავმჯდომარე თუ პრეზიდენტი ან მინისტრები, რომლებიც მხოლოდ რეიტინგებზე ფიქრობენ და ოცნებობენ, ისინი არ არის გულწრფელი მინისტრები, პრემიერები და პრეზიდენტები”, – განაცხადა ღარიბაშვილმა.
მისივე თქმით, თუ მინისტრებს მაღალი რეიტინგი აქვთ, ეს მთავრობის მაღალრეიტინგულობაზე მიუთითებს.
“ჩემთვის მთავარია მოსახლეობა იყოს კმაყოფილი მთავრობის მუშაობით. თუ ჩემი მინისტრები იქნებიან მაღალი რეიტინგით მოსარგებლე, ეს ჩემთვის არის საინტერესო, რადგან მიუთითებს, რომ მთავრობა, როგორც ერთიანი, არის მაღალრეიტინგული. რეიტინგებზე არ უნდა ვიფიქროთ, უნდა ვიფიქროთ მეტი საქმის კეთებასა და იმაზე თუ როგორ შევუმსუბუქოთ მოსახლეობას მდგომარეობა”, – აღნიშნა პრემიერმა.
მისივე თქმით, ცალკე მსჯელობის საკითხია ვინ აკეთებს ამ რეიტინგებს, რა მეთოდოლოგიით კეთდება და ა.შ.
“ღიადაც ვთქვი და არა მხოლოდ მე, საზოგადოებასაც აქვს კითხვები თუ ვინ ასრულებს ამ სამუშაოებს. მთავარია ადგილზე ვინ აკეთებს ამ რეიტინგებს”, – განაცხადა პრემიერმა.
