“სამოქალაქო ჩართულობის ცენტრი” “თანამედროვე ჟურნალისტიკის განვითარების პროექტის” პრეზენტაციას გამართავს. ღონისძიება დღეს, კავკასიის უნივერსიტეტის საკონფერენციო დარბაზში მოეწყობა.
როგორც “თბილისი თაიმსს” “სამოქალაქო ჩართულობის ცენტრიდან” აცნობეს, “სამოქალაქო ჩართულობის ცენტრი”, “ფრიდრიხ ნაუმანის ფონდი თავისუფლებისთვის” მხარდაჭერით თანამედროვე ჟურნალისტიკის განვითარების პროექტს იწყებს, რომლის მიზანსაც საქართველოში საგამოძიებო ჟურნალისტიკის განვითარება და ჟურნალისტებში საგამოძიებო ფილმების მომზადების წახალისება წარმოადგენს.
“პროექტი ითვალისწინებს ჟურნალისტებისთვის, როგორც ტრენინგ-კურსის ჩატარებას საგამოძიებო ჟურნალისტიკის სფეროში სამართლებრივი და ჟურნალისტური მიმართულებით, ასევე, პრაქტიკული სამუშაოების შესრულებას. პროექტის ფარგლებში შეიქმნება “საქართველოს მედია კლუბი ჟურნალისტიკის განვითარებისთვის”, რომელიც ჟურნალისტების პროფესიული კვალიფიკაციის ამაღლებას მოემსახურება”, – აცხადებენ ცენტრში.
მათივე ინფორმაციით, პროექტში მონაწილეობის მიღება შეუძლიათ საინფორმაციო სააგენტოებსა და საგამოძიებო სტუდიებში დასაქმებულ ჟურნალისტებს.
პრეზენტაციაზე დასწრება თავისუფალია. ღონისძიებაში მონაწილეობის მსურველებმა უნდა შეავსონ აპლიკაციის ფორმა.
