მინდა ვთხოვო სახელმწიფო საკონსტიტუციო კომისიის წევრებს, ყველა დაინტერესებულ ადამიანს, მედიის წარმომადგენლებს, მაქსიმალურად შევეცადოთ საკითხის არსში გავერკვეთ და არა სხვადასხვა ვარაუდების საფუძველზე მივაწოდოთ საზოგადოებას ინფორმაცია, – შესაბამისი თხოვნით პარლამენტის თავმჯდომარე დავით უსუფაშვილმა საკონსტიტუციო კომისიის წევრებს, დაინტერესებულ პირებს და მედიის წარმომადგენლებს საკონსტიტუციო კომისიის დღევანდელ სხდომაზე მიმართა.
როგორც უსუფაშვილმა განმარტა, წინ ვერ წავალთ თუ ნებისმიერი კონკრეტული საკითხი გადაითარგმნება ისე, რომ ვიღაცა ვიღაცას ერჩის.
“ხშირად ვერ ხერხდებოდა ჩვენი სულისკვეთების ბოლომდე მიტანა საზოგადოებამდე იმიტომ, რომ როგორც კი რომელიმე სამუშაო ჯგუფში რაღაც მგრძნობიარე თემა გახდებოდა განსჯის საგანი, იწყებოდა სხვადასხვა ტიპის სპეკულაციები იმასთან დაკავშირებით, თუ ვინ რას უჭერს მხარს, ვინ რის გამო ამბობს ამას და არ ამბობს იმას, და ა.შ. მე მინდა ვთხოვო კომისიის წევრებს, ყველა დაინტერესებულ ადამიანს, მედიის წარმომადგენლებს, მაქსიმალურად შევეცადოთ საკითხის არსში გავერკვეთ და არა სხვადასხვა ვარაუდებზე დაყრდნობით მივაწოდოთ ინფორმაცია საზოგადოებას, რადგან როგორც კი ვთქვათ, პარლამენტის უფლებამოსილებაზე ვინმე რამეს იტყვის და ეს იმ წუთში გადაითარგმნება, რომ ვიღაც პარლამენტს ერჩის, ვიღაცას პარლამენტი ან უსუფაშვილი, ან კიდევ უმრავლესობა არ მოსწონს. ასე შორს ვერ წავალთ, ამიტომ საქმიანი საგნობრივი საუბარი არის აუცილებელი ყველა საკითხზე და ეს უნდა მოვახერხოთ”, – განაცხადა დავით უსუფაშვილმა.
მისივე განმარტებით, მაგალითისთვის პარლამენტი სწორედ იმიტომ მოიყვანა და სხვა სახელისუფლებო შტოებზე აქცენტი არ გაუკეთებია, რადგან “შესაძლოა, მისი განცხადებები სათაურებში ყოფილიყო გამოყენებული”.
