2015 წლის 22 აპრილიდან იაპონიაში საქართველოს ოფიციალური სახელწოდება Gurujia-დან “Jojia”(Georgia) იქნება.
როგორც “თბილისი თაიმსს” საგარეო სამინისტროდან აცნობეს, იაპონიის პარლამენტის წარმომადგენელთა (ქვედა) პალატამ მ.წ. 14 აპრილს დაამტკიცა საკანონმდებლო ცვლილება, რომლის თანახმადაც საქართველოს ოფიციალური დასახელება იაპონურად „გურუჯია“-ს მაგივრად „ჯორჯია“-თი შეიცვალა.
უწყების ცნობით, 2009 წელს ქართული მხარის თხოვნის საფუძველზე, აღნიშნული გადაწყვეტილება იაპონიის აღმასრულებელმა ხელისუფლებამ 2014 წლის შემოდგომაზე მიიღო და ცვლილება დასამტკიცებლად იაპონიის საკანონმდებლო ორგანოში გადაიგზავნა.
იაპონიის პრემიერ-მინისტრმა, შინძო აბემ გადაწყვეტილება პირველად იაპონიაში საქართველოს პრეზიდენტის, გიორგი მარგველაშვილის ოფიციალური ვიზიტის ფარგლებში გამართულ ორმხრივ შეხვედრაზე გაახმოვანა.
