დღეს საქართველოს სასჯელაღსრულების, პრობაციისა და იურიდიული დახმარების საკითხთა სამინისტროს, შრომის, ჯანმრთელობისა და სოციალური დაცვის სამინისტროს და წითელი ჯვრის საერთაშორისო კომიტეტს შორის საქართველოს პენიტენციურ სისტემაში პირველადი ჯანდაცვის მოდელის გავრცობის შესახებ ურთიერთგაგების მემორანდუმი გაფორმდა.
მემორანდუმი ჩამოყალიბდა მხარეებს შორის გამართული თანმიმდევრული მოლაპარაკებების საფუძველზე და ეფუძნება პენიტენციურ სისტემაში პირველადი ჯანდაცვის საჭიროებათა შეფასების შედეგებსა და 2011-2012 წლებში მისი პილოტირებისა და სასჯელაღსრულების ხუთ დაწესებულებაში (#5,6,7,8,11 და 12) განვრცობის შედეგად მიღებულ გამოცდილებებსა და მიღწევებს.
სასჯელაღსრულების სამინისტროს ცნობით, პენიტენციური სისტემის პირველადი ჯანდაცვის პროექტის განვრცობის მიზანია სამედიცინო მომსახურების ხელმისაწვდომობა იმ დაწესებულებებში, სადაც პროექტი დაინერგება, დაავადების დროული აღმოჩენა, საუკეთესო კლინიკური პრაქტიკის (გაიდლაინების) ეროვნული რეკომენდაციების განხორციელებით, იდენტიფიცირებული შემთხვევების აღრიცხვა და კლინიკური პრაქტიკის ეროვნული რეკომენდაციებითა და საერთაშორისო სტანდარტებით განსაზღვრული მკურნალობის ჩატარება, სამედიცინო პერსონალის შესაბამისი უნარების განვითარება პროფესიული განვითარების საბჭოს მიერ დამტკიცებული ოჯახის ექიმისა და ზოგადი პრაქტიკის ექთნის პროფესიული მომზადების პროგრამის შესაბამისად, მომარაგება ბაზისური (პირველი რიგის) მედიკამენტებით, სტომატოლოგიური მომსახურების, ფსიქიკური ჯანმრთელობისა და ინფექციათა კონტროლის კომპონენტების გაძლიერება, პენიტენციური ჯანდაცვის ერთიანი საინფორმაციო სისტემის შექმნა საზოგადოებრივი ჯანდაცვის სტანდარტების შესაბამისად (ICD-10 და ICPC-2) დაავადებათა რეგისტრაციის გზით.
მემორანდუმის მიზანია საქართველოს პენიტენციური სისტემის შვიდ დაწესებულებაში (#2,3,4,14,15,16 და 17) პირველადი ჯანდაცვის მოდელის განვრცობა, რომელიც ეფუძნება სახელმწიფო სტანდარტებს, პჯდ პილოტირების/განვრცობის შედეგად მიღებულ გამოცდილებასა და მიღწევებს და საერთაშორისო ექსპერტთა რეკომენდაციებს.
06.06.13
