“ნატო-ს სამხედროები დაგეხმარებიან თავდაცვის რეფორმების კუთხით” – ეს კომენტარი ნატო-ს გენერალურმა მდივანმა, იენს სტოლტენბერგმა გუშინ, ნატო-ს შტაბბინაში, საქართველოს პრეზიდენტ გიორგი მარგველაშვილთან ერთად გამართულ პრესკონფერენციაზე გააკეთა.
მისი თქმით, ნატო საქართველოს დაეხმარება, რათა მისი თავდაცვა იყოს უფრო მოდერნიზებული.
“გასულ წელს ჩვენ სამიტზე ინიციატივაში მონაწილეობა შემოგთავაზეთ იმისთვის, რომ გაგეძლიერებინათ შესაძლებლობები პარტნიორებთან ერთად. ჩვენ ასევე ავამოქმედეთ არსებითი პაკეტი იმისთვის, რომ საქართველომ გააძლიეროს თავდაცვითი შესაძლებლობები. ეს ინიციატივები ხორციელდება. ნატო-ს სამხედროები დაგეხმარებიან თავდაცვის რეფორმების კუთხით. ასევე, წელს ჩვენ ნატო-საქართველოს ერთობლივ საწვრთნელ ბაზას შევქმნით საქართველოში”, – განაცხადა სტოლტენბერგმა.
მისივე თქმით, საქართველო ნატო-ს ძლიერი პარტნიორი და მნიშვნელოვანი კონტრიბუტორია ერთობლივი უსაფრთხოების კუთხით.
“თქვენ ჩვენს ოპერაციებში მნიშვნელოვან როლს ასრულებთ. დღეს საქართველო ავღანეთში ჩვენი მისიის ფარგლებში სიდიდით მეორე კონტრიბუტორია. საქართველოს სამხედროები ნატო-ს გვერდით წლების განმალობაში იბრძვიან. ჩვენ ამისთვის მადლობელი ვართ”, – აღნიშნა ნატო-ს გენერალურმა მდივანმა.
იენს სტოლტენბერგმა ასევე განაცხადა, რომ საქართველოს მნიშვნელოვანი პროგრესი აქვს თავდაცვის სფეროში.
“ჩვენ მივესალმებით იმ ამბიციურ გეგმებს, რომლებიც ამ წლისთვის გამოაცხადეთ. ჩვენ მხარს გიჭერთ დემოკრატიული რეფორმების გაღრმავებაში, რომელიც დამოუკიდებელი სასამართლოს გაძლიერებას და კანონის უზენაესობას ეხება”, – აღნიშნა იენს სტოლტენბერგმა.
