კანის კიბოსა და მელანომის ადრეული დიაგნოსტიკის მიზნით, 24-31 მაისს პანევროპული კამპანია „ევრომელანომა 2015-ის“ ფარგლებში თბილისში, ქუთაისში, რუსთავსა და ბათუმში მოსახლეობის უფასო გამოკვლევა ჩატარდება.
როგორც “თბილისი თაიმსს” მერიიდან აცნობეს, მოსახლეობას სკრინინგს, ქვეყნის მასშტაბით, ევრომელანომის ქართული ჯგუფი ჩაუტარებს. ამ მიზნით, დღეიდან 25 წლის ზემოთ ყველა მსურველს, ვისაც კანზე რაიმე საეჭვო წარმონაქმნი აქვს, შეუძლია დარეკოს შემდეგ ნომრებზე: თბილისში – 2 30 54 17 და 2 18 22 58, ქუთაისში – 24 12 48; ბათუმში – 568 10 44 10; რუსთავში 228 001 და 278 485.
საქართველოს ფოტოდერმატოლოგიისა და კანის კიბოს ასოციაციის პრეზიდენტის, ევრომელანომის კამპანიის ეროვნული წარმომადგენლის, ექიმ-დერმატოლოგ, პროფესორ ლალი მეკოკიშვილის განცხადებით, საეჭვო ნიშნების შემჩნევისთანავე, განკურნებისთვის დაუყოვნებელი მოქმედებაა საჭირო. მისივე განცხადებით, ადრეული დიაგნოსტიკა მკურნალობის ხარჯებს მნიშვნელოვნად ამცირებს და პაციენტის გადარჩენის შანსს ზრდის.
საქართველო პანევროპულ კამპანიას „ევრომელანომა“ 2012 წელს შეუერთდა. 2012-2014 წლებში ჩატარებული კამპანიის ფარგლებში 3000-მდე მოქალაქე გაისინჯა. გამოვლინდა კანის კიბოსა და მელანომის მქონე პაციენტები, რომელთაც შესაბამისი მკურნალობა უფასოდ ჩაუტარდათ. როგორც ლალი მეკოკიშვილმა აღნიშნა, წელს ევროპელი კოლეგების მხარდაჭერით, შესაძლებელი იქნება ყველა საეჭვო შემთხვევის ტელემედიცინის მეშვეობით გადამოწმება.
თბილისის მერიის ჯანდაცვისა და სოციალური მომსახურების საქალაქო სამსახურის უფროსის გელა ჩივიაშვილის განცხადებით, თბილისის მერია „ევრომელანომა 2015-ის“ მხარდამჭერია და დედაქალაქის მოსახლეობას დროული დიაგნოსტიკისა და მკურნალობის ჩატარებისკენ მოუწოდებს. მისი განცხადებით, კანის კიბოს შემჩნევა შესაძლებელია და დროული აღმოჩენის შემთხვევაში ის განკურნებადია.
როგორც პრეს-კონფერენციაზე აღინიშნა, კანის კიბო უპირატესად 50 წლის ზევით ასაკის ადამიანებში ვლინდება, განსაკუთრებით იმ პირებში, რომლებიც მზის ხანგრძლივი ან ინტენსიური გამოსხივების ქვეშ იმყოფებოდნენ. თუმცა, მისი განვითარება ადრეულ ასაკშიც შესაძლებელია.
ჩვეულებრივზე უფრო მაღალი რისკის ჯგუფს მიეკუთვნებიან ადამიანები, რომლებსაც ღია ფერის კანი აქვთ ან ისინი, ვინც ადვილად იწვებიან მზეზე, რომლებსაც ბავშვობაში მზით დამწვრობა აქვთ მიღებული, რომლებიც დიდ დროს ატარებენ მზეზე (გარე სამუშაოს ან ჰობის გამო), დროდადრო მზის ინტენსიური გამოსხივების ქვეშ იმყოფებიან (ზღვაზე, მთაში), ხშირად დადიან სოლარიუმში, 50-ზე მეტი ხალი აქვთ, კანის კიბოს ოჯახური შემთხვევა აღენიშნებათ, რომელთა ასაკი აღემატება 50 წელს და რომელთაც გადანერგილი ორგანო აქვთ.
