ქართული საპატიმროდან გათავისუფლებული მარეკ დუდაევი უკვე ე.წ. სამხრეთ ოსეთში, საკუთარ სახლში იმყოფება.
ამის შესახებ სააგენტო “რესი” ე.წ. სამხრეთ ოსეთის დე ფაქტო პრეზიდენტისა და დე ფაქტო მთავრობის პრეს-სამსახურზე დაყრდნობით იუწყება.
“მარეკ დუდაევი, რომელიც 2004 წლის მარტში ქართულმა სპეცსამსახურებმა მშობლიური სოფელ არცევიდან გაიტაცეს, ქართული ციხიდან გუშინ საღამოს გაათავისუფლეს და ამჟამად სამხრეთ ოსეთში, საკუთარ სახლში იმყოფება”, – აცხადებენ პრეს-სამსახურში.
მისივე ინფორმაციით, “იანვარში პრეზიდენტ ლეონიდ თიბილოვისა და ჟენევის დისკუსიების თანათავმჯდომარეების შეხვედრაზე, სახელმწიფოს მეთაურმა განსაკუთრებული ყურადღება მარეკ დუდაევისა და სამხრეთ ოსეთის იმ სამი მოქალაქის მდგომარეობას დაუთმო, რომლებიც ქართულ ციხეში იმყოფებიდან და სამუდამო პატიმრობა აქვთ მისჯილი. თავის მხრივ, თანათავმჯდომარეებმა აღნიშნული საკითხი საქართველოს მთავარ პროკურორ არჩილ კბილაშვილთან და საქართველოს ხელისუფლების სხვა წარმომადგენლებთან შეხვედრაზე დააყენეს”.
ცხინვალში მცხოვრები მარეკ დუდაევი ქართველმა სამართალდამცავებმა 2004 წელს დააკავეს, რის შემდეგაც სასამართლომ დამნაშავედ სცნო მკვლელობაში, ყაჩაღობასა და ფულის გამოძალვაში. მისთვის დაკისრებული სასჯელი უცვლელი დატოვა საქართველოს სასამართლოს ყველა ინსტანციამ. სამართალდამცავებისვე განცხადებით, ის ”კრიმინალური ავტორიტეტი” იყო.
მარეკ დუდაევი ბრალს არ აღიარებდა და მის დაკავებას ქართული მხარის პრვოკაციად აფასებდა. მარეკ დუდაევის დაპატიმრებაზე საგამოძიებო ფილმი მისი დაკავების შემდეგ მოამზადა ჟურნალისტმა ვახტანგ კომახიძემ, სადაც საუბარი იყო მარეკ დუდაევის საქმეში არსებულ შეუსაბამობებზე.
საქმეში არსებულ ხარვეზებზე 2013 წლის თებერვალში ისაუბრა საქართველოს სახალხო დამცველმა უჩა ნანუაშვილმაც, რომელმაც განაცხადა, რომ კარგი იქნება, თუ სახელმწიფო ჰუმანიტარული მოსაზრებებით ქართულ საპატიმროებში მყოფ ცხინვალელ პატიმრებს, მათ შორის მარეკ დუდაევს, დე ფაქტო სამხრეთ ოსეთის ხელისუფლებას გაუცვლის ცხინვალის ციხეში მყოფ ქართველ ტყვეებში.
”ნეტგაზეთის” ინფორმაციით, მარეკ დუდაევი უკვე ცხინვალში იმყოფება და ხვალ ჩავა თავის სოფელში, სადაც დაესწრება შვილის დაბადების დღეს, რომელიც დაპატიმრების შემდეგ არ უნახავს. როგორც ჩვენთვის გახდა ცნობილი, დუდაევისთვის პატიმრობიდან გათავისუფლება მოულოდნელი აღმოჩნდა.
მისი გათავისუფლება სასამართლოს გადაწყვეტილებით მოხდა.
შეგახსენებთ რომ მას 23 წელი ჰქონდა მისჯილი.
10.06.13
